"Uşaqlar hər bir cəmiyyətin gələcəyidir. Onların təhsili, inkişafı və rifahı ölkəmizin sabahı deməkdir. Məhz bu səbəblə, Azərbaycan dövləti, o cümlədən Elm və Təhsil Nazirliyi uşaqların hərtərəfli inkişafı, keyfiyyətli təhsil alması və sağlam mühitdə böyüməsi üçün ardıcıl və sistemli fəaliyyəti həyata keçirir".

"Azərbaycan müəllimi" xəbər verir ki, bunu Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdir müavini Ayla Həsənova-Məmmədova "Regional İnkişaf" İctimai Birliyinin "Hüququnla Parla!" layihəsinin hesabat tədbirində çıxışı zamanı deyib.

O bildirib ki, uşaqların təhsil almaq hüququ dövlətimiz tərəfindən ən yüksək səviyyədə tanınır və qorunur.

"Azərbaycan Respublikasının Konstitusiyasının 42-ci maddəsinə görə, hər bir vətəndaşın təhsil almaq hüququ vardır və ümumi orta təhsil icbaridir. "Təhsil haqqında" Qanun bu hüququ daha da genişləndirərək, uşaqların təhsildə bərabər imkanlara malik olmasını və təhsil hüququnun qorunması ilə bağlı hüquqi mexanizmlərin fəaliyyətini təmin edir. Bu sənədlər fəaliyyətimizin hüquqi əsasını təşkil edir və biz bu öhdəlikləri daim rəhbər tutaraq, hər bir uşağın savadlı, yaradıcı və azad düşüncəli vətəndaş kimi yetişməsi üçün icbari təhsillə yanaşı, müxtəlif layihələr və proqramlar həyata keçiririk".

Ayla Həsənova-Məmmədova onu da qeyd edib ki, bu gün Azərbaycan məktəblərində 1 miyon 700 mindən artıq uşaq müasir tədris mühitində təhsil alır, innovativ texnologiyalardan istifadə edərək bilik və bacarıqlarını artırır:

"Biz inanırıq ki, hər bir uşağın təhsil hüququ qorunmalı və hər bir uşaq öz potensialını tam şəkildə reallaşdıra bilməlidir. Qeyd edilənlərin təmin edilməsi məqsədilə ucqar bölgələrdə və kəndlərdə mütəmadi məktəblərin tikintisi və təmiri işləri aparılır. Eləcə də həssas qrupları təmsil edən uşaqlar üçün xüsusi tipli təhsil müəssisələri fəaliyyət göstərir və inklüziv təhsil sinifləri və proqramları təşkil edilir. Məktəblərdə uşaqların emosional və sosial inkişafının dəstəklənməsi üçün məktəb psixoloqlarının fəaliyyəti ilə yanaşı, xüsusi dəstək xidmətləri təşkil edilir".

Nazirlik rəsmisi əlavə edib ki, uşaqların hərtərəfli inkişafı məqsədilə yaradıcı layihələr və müsabiqələr həyata keçirilir, bunlardan STEAM, Rəqəmsal Bacarıqlar layihəsi eləcə də məktəbdənkənar təhsil proqramlarını qeyd etmək olar:

"Bu gün övladlarımızın oxumağı, öyrənməyi, yaratmağı üçün bütün imkanlar mövcuddur. Onlar tək deyil. Onları sevən müəllimlər, dövlət və cəmiyyət var. Uşaqlarımıza düşən isə böyük xəyallar qurmaq, bilik qazanmaq və dürüst insan olmaqdır.

Çıxışımın əvvəlində də qeyd etdiyim kimi, “Uşaqlar bizim gələcəyimizdir – bu, sadəcə bir ifadə deyil, bu, bizim bugünkü öhdəliyimiz, məsuliyyətimiz və ən böyük ümidimizdir. Çünki hər bir uşağın içində böyüyəcək bir vətəndaş, formalaşacaq bir şəxsiyyət, dəyişəcək bir dünya var”, - deyə o qeyd edib.