2025-ci il 24-26 may tarixlərində Minsk şəhərində tərəfdaş ölkələrinin iştirakı ilə peşə təhsili sahəsinə həsr olunmuş genişmiqyaslı işgüzar proqram həyata keçirilib və tədbirdə Azərbaycan Respublikasını Peşə Təhsili üzrə Dövlət Agentliyinin nümayəndə heyəti təmsil edib.

Agentlikdən “Azərbaycan müəllimi”nə bildirilib ki, dördgünlük proqram çərçivəsində iştirakçıları Belarusda keçirilən “ProfSkills Belarus 2025” adlı VI Respublika peşə ustalığı müsabiqəsi çərçivəsində təşkil olunmuş kompetensiya yarışlarını izləyib, Minskin qabaqcıl təhsil müəssisələri, kompetensiya mərkəzləri və təhsil texnologiyaları sərgisi ilə tanış olublar.

Proqramın ikinci günü plenar iclas formatında təşkil olunan tədbirdə iştirakçı ölkələrin milli peşə təhsili sistemlərinin inkişaf istiqamətləri, birgə layihələrin həyata keçirilməsi imkanları, peşə təhsili sahəsində qarşılıqlı təcrübə mübadiləsi və sistemin davamlı inkişaf perspektivləri geniş müzakirə olunub.

Eyni zamanda, proqram çərçivəsində peşə təhsili müəssisələrində tədris prosesinin müasir çağırışlara uyğun təşkili, rəhbər və pedaqoji heyətin potensialının gücləndirilməsi ilə bağlı sessiyalar keçirilib.

Tərəfdaş ölkələrinin milli peşə təhsili müəssisələrini təmsil edən komandalar arasında 29 kompetensiya üzrə keçirilən "ProfSkills Belarus 2025" adlı VI Respublika peşə ustalığı müsabiqəsində  Azərbaycan Respublikası Sənaye və İnnovasiyalar üzrə Bakı Dövlət Peşə Təhsil Mərkəzi, Turizm və Sosial Xidmətlər üzrə Bakı Dövlət Peşə Təhsil Mərkəzi və Qəbələ Dövlət Peşə Təhsil Mərkəzinin müəllim və tələbələri tərəfindən təmsil olunub. Tələbələr “Restoran servisi”, “Qrafik dizayn” və “Mühəndis dizaynı (CAD)” ixtisasları üzrə yarışlarda iştirak edərək bilik və bacarıqlarını nümayiş etdiriblər.

Bildirilib ki, iki ölkə arasında imzalanmış Memoranduma əsasən, Belarusiya ilə avtomobil texnologiyaları, kənd təsərrüfatı və digər sahələr üzrə peşə emalatxanalarının yaradılması, idarəetmə heyəti və təhsilverənlər üçün təkmilləşdirmə və təcrübə proqramlarının təşkili, peşə bacarıqları üzrə yarışların keçirilməsi və beynəlxalq yarışlarda iştirak, təlim-tədris materiallarının hazırlanması, eləcə də beynəlxalq layihələrdə birgə əməkdaşlıq istiqamətində fəaliyyətlər həyata keçirilir.