Böyük xeyriyyəçi Hacı Zeynalabdin Tağıyev deyirdi: “Bir kişiyə təhsil verməklə savadlı bir insan, bir qadına təhsil verməklə isə savadlı bir ailə və cəmiyyət qazanarsınız".

Qızların təhsil almalarına hər zaman önəm yetirilən Naxçıvan Muxtar Respublikasında 1992-ci ildən “Xanım Qızlar Pansionu” yaradılıb. 2004-cü ildən “Naxçıvan Qızlar Liseyi” adı ilə fəaliyyətini davam etdirən lisey Azərbaycanda yeganə qızlar məktəbidir. Bu gün də lisey öz fəaliyyəti və göstəriciləri ilə öndə dayanıb. 

Birləşmiş Millətlər Təşkilatının Baş Assambleyası qızların hüquqlarını və onların qarşılaşdıqları unikal çətinlikləri tanımaq məqsədilə 2011-ci il dekabrın 19-da bu tarixi Beynəlxalq Qızlar Günü elan edib.  2012-ci il oktyabrın 11-dən isə hər il Beynəlxalq Qızlar Günü kimi qeyd edilir. Bu, bütün dünyada qızların hüquqlarının qorunmasına və cəmiyyətin bu məsələlərə diqqətini çəkməyə yönəlmiş təşəbbüsdür.

Qızlar günü münasibətilə Naxçıvan Qızlar Liseyinə üz tutduq. Fotolorda da gördüyünüz kimi, müəllim və şagird heyəti bizi çox böyük səmimiyyət ilə qarşıladı. 

Liseyi gəzib tanış olduqdan sonra uzun illər burada müəllim kimi fəaliyyət göstərən Aidə Allahverdiyeva ilə söhbətləşdik: “Kollektivin əsas məqsədi liseydə təhsil alan qızlarımızın bu  günün tələblərinə cavab verməsi, eyni zamanda cəmiyyətə yüksək şəkildə fayda verməsindən ibarətdir”, - deyə Aidə xanım söhbətə başladı. Bildirdi ki, bu gün dövlətimizin siyasətində qadınların elm və təhsildə roluna, qadın əməyinə yüksək qiymət verilib:
"Qadınların əməyinin qiymətləndirilməsinin əsası Ulu Öndər Heydər Əliyev tərəfindən qoyulub və bu ənənə hazırda Prezident İlham Əliyev tərəfindən uğurla  davam etdirilir. Naxçıvan qadınları da hazırda dövlət işlərində, elm və təhsil sahəsində çalışmaqla ölkəmizin inkişafına öz töhfələrini verirlər. Çalışırıq ki, bizim liseyimizdə yetişən xanımlar, liseyimizin məzunları hər zaman cəmiyyətdə öndə getsinlər, təhsil yüksək səviyyədə  olsun. Hər il yüksək bal toplayan şagirdlərin sayı artır. Bu gün istəyirik ki, zəfər qazanmış xalqımızın, zəfər qazanmış qızları olsun. Bir şeyi də xüsusilə diqqətə çatdırmaq istəyirəm ki, ötən il Azərbaycan Dövlət  İqtisad Universitetindən bizim liseyimizə iki təşəkkür məktubu daxil olub. Orada bizim iki məzunumuz təhsil alır. Təbii ki, bu təşəkkür bizi fərəhləndirir. Müəllim üçün bundan sevindirici nə ola bilər? Əlbəttə, yetişdirdiyi şagirdi yaxşı mövqedə görmək”.

Bu gün Naxçıvan Qızlar Liseyinin məzunları ölkəmizdə və onun ayrılmaz tərkib hissəsi olan muxtar respublikada cəmiyyət həyatının müxtəlif sahələrində müvafiq vəzifələrdə çalışırlar. Naxçıvan Muxtar Respublikasının İnsan Hüquqları üzrə Müvəkkili (Ombudsman) Günay Rzayeva da 2000-2008 -ci illərdə sözügedən liseyin şagirdi olub. O, öz təəssüratlarını və liseylə bağlı xoş xatirələrini “Azərbaycan müəllimi” ilə bölüşdü: 
“Ümumiyyətlə, mən sizə bildirim ki, bəlkə də, şagird vaxtı fərqində deyildik, ora təkcə təhsil müəssisəsi deyil, eyni zamanda  bir qızın bir xanım kimi, Azərbaycan xanımı kimi formalaşmasında rolu olan böyük müəssisədir. Qəbul olduğum dövrlərdə orada müəllimlərimiz bizə təkcə müəllim kimi deyil, eyni zamanda tərbiyəçimiz kimi davranırdılar. Qeyd edim ki, o vaxtlar sadəcə bizim bir otağımız var idi və çox şəraitsiz binada təhsil alırdıq. Ancaq, mən məktəbi bitirənə qədər bina yeniləndi və məktəbə lisey statusu verildi. Həqiqətən də bizim üçün bu, çox sevindirici hal idi. O dövrdə bizdə bir tendensiya var idi: müəllimlərimizə "Xanım" deyə müraciət edirdik. Hesab edirəm ki, bu bizim üzərimizə bir vəzifə kimi qoyulmuşdu.

Biz sadəcə dərslərlə kifayətlənmirdik, muxtar respublika səviyyəsində tədbirlərimiz olurdu, mən də həmin tədbirlərin aparıcısı olurdum. Müxtəlif şeir müsabiqələrində qalib olub, fəxri fərmanlar qazanırdım. Onu da qeyd edim ki, bizim liseydə hər həftənin sonunda "Həftənin xanımı", ilin sonunda "İlin xanımı" adlarını qazanmaq üçün mübarizə gedirdi. Ən yüksək ad isə "Xanımların xanımı" idi. Sevinirəm ki, dəfələrlə "İlin xanımı", "Xanımların xanımı" adına layiq görülmüşəm. Qürur duyuram ki, bu gün ombudsman kimi bu müəssisənin şagirdi olmuşam və o liseyin fəaliyyətini uğurlu hesab edirəm".