“İnklüziv təhsil həftəsi” çərçivəsində Bakı Slavyan Universitetinin (BSU) bir qrup tələbə və müəllim heyəti, eləcə də Autizm Mərkəzinin xüsusi qayğıya ehtiyacı olan uşaqları STEAM İnnovasiya Mərkəzində ekskursiyada olublar.

Universitetdən “Azərbaycan müəllimi”nə bildirilib ki, ekskursiya çərçivəsində iştirakçılar mərkəzin aviasiya sahəsi, klassik Nyuton və “Heureka Classics” otaqları, robotların hazırlanması laboratoriyası, “3D hologram” və VR (Virtual Reallıq) zonaları ilə yaxından tanış olublar. Mərkəzin bələdçiləri tərəfindən təqdim edilən geniş və ətraflı məlumatlar iştirakçılarda böyük maraq və müsbət təəssürat yaradıb.

Tədbir zamanı STEAM İnnovasiya Mərkəzinin əsas məqsədinin təhsilalanların potensialını və maraqlarını cəmiyyətin inkişafına yönəltmək, tədqiqatçılıq bacarıqlarını inkişaf etdirmək və elmə maraq yaratmaq olduğu vurğulanıb. Mərkəzin nümayəndələri inklüziv mühitin yaradılmasının hər bir uşağın, o cümlədən xüsusi qayğıya ehtiyacı olan fərdlərin innovativ və yaradıcı fəaliyyətlərə cəlb olunmasına imkan verdiyini xüsusi qeyd ediblər.

Qeyd edək ki, STEAM İnnovasiya Mərkəzinin yaradılması ölkəmizdə elm və təhsil sahəsində müasir texnologiyaların tətbiqi, tədrisin yeni metodlarla zənginləşdirilməsi və gənc nəslin elmi potensialının üzə çıxarılması istiqamətində həyata keçirilən dövlət siyasətinin uğurlu nəticələrindən biridir. Bu cür tədbirlərin təşkili inklüziv təhsilin cəmiyyətin bütün sahələrində tətbiqinə dəstək olmaqla sosial inteqrasiyanı gücləndirməyə xidmət edir.