Cənubi Koreyada məktəblərdə dərs saatlarında mobil telefon və ağıllı cihazlardan istifadəyə qadağa qoyulub. 

“Azərbaycan müəllimi” xəbər verir ki, qanun 2026-cı ilin martından qüvvəyə minəcək və bu, ölkəni uşaqlar və yeniyetmələr arasında telefon istifadəsini məhdudlaşdıran dövlətlər sırasına daxil edəcək.

Yeni qanun smartfon asılılığına qarşı mübarizə məqsədilə qəbul edilib. Deputatlar, müəllimlər və valideynlər bildirirlər ki, telefonlardan həddindən artıq istifadə şagirdlərin dərs nailiyyətlərinə mənfi təsir göstərir və onların həm təhsildən, həm də sosial fəaliyyətlərdən yayınmasına səbəb olur. Hökumətin 2024-cü ildə apardığı araşdırmaya görə, ölkə əhalisinin dörddə biri telefondan həddən artıq asılıdır, bu göstərici 10-19 yaş arası qrupda isə 43 faizə çatır.

Qanun dərs vaxtı telefon istifadəsini qadağan etməklə yanaşı, müəllimlərə məktəb ərazisində şagirdlərin telefondan istifadəsini məhdudlaşdırmaq səlahiyyəti verir. Bununla yanaşı, məktəblərə şagirdlərə ağıllı cihazlardan düzgün istifadə qaydaları ilə bağlı maarifləndirmə aparmaq da tapşırılır. Əlilliyi və xüsusi təhsil tələbatı olan şagirdlər, həmçinin təcili hallarda və tədris məqsədilə telefon istifadəsinə icazə veriləcək.

Müəllimlər arasında bu məsələyə münasibət birmənalı deyil. Müəllimlərin bir hissəsi sinifdə mobil telefonların yaratdığı diqqət yayındırıcı halları önləmək baxımından qərarı dəstəkləyir. Digər qrup isə hesab edir ki, qadağa şagirdlərin telefonlara çıxış hüququnu məhdudlaşdırır və problemin kökünə yox, yalnız nəticəsinə toxunur.

Valideynlər də oxşar narahatlıqlar bildirirlər. Bir tərəfdən, onlar uşaqların dərs prosesindən yayınmasından, sosial mediada aqressiv davranışlardan və kiberzorakılıqdan ehtiyat edirlər. Digər tərəfdən, bəzi valideynlər və şagirdlər düşünürlər ki, əsas problem telefonların özündə deyil, ölkədə mövcud olan sərt və rəqabətli təhsil sistemi ilə bağlıdır.

Şagirdlər isə müxtəlif mövqelər sərgiləyirlər. Bəziləri telefonların dərsdə diqqəti yayındırdığını etiraf etsə də, digərləri bildirirlər ki, qadağa real nəticə verməyəcək, çünki uşaqlar dərsdən kənarda – yolda və evdə yenə də telefondan istifadə edəcəklər. Onların fikrincə, telefonların sadəcə qadağan olunması kifayət etmir, məktəblərdə şagirdlərə sağlam rəqəmsal vərdişlərin öyrədilməsi vacibdir.