"Müşahidələr göstərir ki, staj üçün dərslərdə iştirak edən müəllim namizədləri, yəni pedaqoji fakültələrin tələbələri o qədər də hazırlıqlı deyillər. Hazırlıqlı olmamaları ilə yanaşı, daha pisi odur ki, öyrənmək üçün həvəsli də deyillər. Belə görünür ki, ixtisaslarını həvəssiz seçiblər".

"Azərbaycan müəllimi" xəbər verir ki, bunu təhsil mütəxəssisi Yalçın İslamzadə sosial şəbəkə hesabında yazıb.

"Fəaliyyətə başladıqdan sonra müəllimlər sertifikasiya olunacaqlar. Halbuki, həmin müəllimlərə hansı mövzuları necə öyrədiblərsə, onlar da elə öyrəniblər. Verdikləri imtahanlar universitetdəki müəllimlərinin tərtib etdikləri suallardır. Müəllimlərdən əvvəl müəllimlərə dərs keçən müəllimlər sertifikasiya olunmalıdırlar. Çünki gənc müəllimin öz-özünə çatışmayan bilik və bacarıqları müəyyən edib, öz üzərində işləməsi elə də asan proses deyil.

Pedaqoji fakültələrin müəllimlərinin yaş ortalaması neçədir? Neçəsi təhsil sahəsindəki yenilikləri oxuyub-öyrənəcək dərəcədə xarici dil bilir? Təbiət fənləri, riyaziyyat, ümumi təhsilə dair tanınmış jurnalların hansına abunədirlər? Universitet kitabxanası son 20-30 ildə həndəsi silsilə ilə artan təhsil tədqiqatlarını əks etdirən kitabları alırmı? 

Keçdikləri dərslər nə qədər effektivdir? Bu il universitetə başlayacaq bir tələbə dərs keçdikləri kitablarla tanış olmaq istəyir. Üçüncü kursda oxuyan başqa tələbə deyir ki, "Dərslik yoxdur. Müəllim mühazirə yazdırır, biz də ordan öyrənirik". Başqa bir müəllimin axşamlar votsap qrupuna uzun-uzadı əlyazısı mətnlər göndərdiyi məlumdur. 

Nə üçün beynəlxalq tədrisdə etibar qazanmış dərsliklərdən istifadə olunmur? X müəllimin 30 ildir əlyazısı ilə paylaşdığı mühazirələri nə qədər aktualdır? Əzbərləməkdən başqa koqnitiv fəaliyyətlər də tələb edir?

1-ci kursların kimya dərsləri üçün Raymond Chang, riyaziyyat dərsləri üçün James Steward, iqtisad dərsləri üçün Lipsey & Courant kimi müəlliflərin sınanmış dərslikləri var. Douglas Giancolinin "Fizika, prinsiplər və tətbiqlər" kitabı həm konseptual yanaşmanı, həm də fizikanın digər sahələrdə tətbiqini uğurla əks etdirir. Bu kitabı tərcümə etmək o qədər çətin olmamalıdır. 

Heç bir mühazirə belə dərsliklərlə izah dərinliyi və əhatəlilik, vizuallıq, fənni digər kontekstlərlə əlaqələndirmək və dərin suallar soruşmaq baxımından rəqabət apara bilməz.

Kitabxana, sahənin qabaqcıl jurnallarına abunəlik yaxşı təhciz olunmuş laboratoriyalar, tərcümə olunmuş ədəbiyyat yoxdursa, universitetlər təhsil haqqını niyə artırırlar? Artırırlarsa niyə investisiyaya istiqamətləndirmirlər?", - deyə ekspert vurğulayıb.