"Bu tədris ilində ölkə üzrə 30-a yaxın məktəb tikilib istifadəyə verilib və əsaslı təmir olunub. Fərəhləndirici haldır ki, Qarabağda bir çox yeni məktəblər fəaliyyət göstərəcək".

"Azərbaycan müəllimi" xəbər verir ki, bu fikirləri elm və təhsil nazirinin müavini Firudin Qurbanov Abşeron rayonu, Saray qəsəbə 1 nömrəli tam orta məktəbdə “Bilik günü” tədbirində iştirak edərkən jurnalistlərə açıqlamasında qeyd edib.

Nazir müavini Qarabağda cari tədris ilində yeni 11 ümumtəhsil və 7 məktəbəqədər təhsil müəssisəsinin fəaliyyət göstərəcəyinə, eyni zamanda Qarabağ Universitetində Tibb fakültəsinin açılışına diqqət çəkərək bütün bunların ölkə Prezidenti İlham Əliyevin təhsilə çox böyük diqqət və qayğısının göstəricisi olduğunu qeyd edib. 

"Təhsil ölkənin gələcəyidir. Təhsilalanlar və təhsilverənlər üçün dövlət tərəfindən lazımi şərait yaradılıb ki, tədrisin keyfiyyəti yüksək səviyyədə olsun", - Firudin Qurbanov bildirib. 

Saray qəsəbə 1 nömrəli tam orta məktəbin yeni binası ilə yaxından tanış olan nazir müavini qeyd edib ki, 960 şagird yerlik müasir tələblərə cavab verən təhsil ocağı təhsilalanların yüksək nəticə göstərməsinə imkan yaradacaq. 

"Ölkəmizdə son illər təhsildə yüksək nailiyyətləri görürük. Bir çox istiqamətlərdə təhsilin maddi-texniki bazasının gücləndirilməsi STEAM layihəsi kimi müsair tədris texnologiyalarının tətbiqinə imkan yaradır. Bunların nəticəsi olaraq şagirdlərimizin yüksək nailiyyətlərini qeyd etmək lazımdır. Keçən tədris ilində şagirdlərimiz beynəlxalq olimpiadalarda 50 medal qazanıblar. Bunların 5-i qızıl medaldır".

Məktəb məzunlarının göstərdiyi yüksək nəticələri də vurğulayan nazir müavini bildirib ki, bütün sadalananlar ölkəmizdə təhsil sahəsində dövlətin siyasətinin lazımi səviyyədə həyata keçirilməsinin bariz nümunəsidir.