Gürcüstanın Kvemo Orozmani kəndində aparılan arxeoloji qazıntılar zamanı alimlər 1,8 milyon il əvvələ aid insan çənə sümüyü aşkarlayıblar. Tədqiqatçılar bu tapıntının Avrasiya qitəsindəki ilk insan məskənlərinin öyrənilməsinə mühüm işıq tutacağını bildirirlər.

"Azərbaycan müəllimi" REUTERS-ə istinadən xəbər verir ki, Orozmani qazıntı sahəsi kiçik ölçüsünə baxmayaraq, tarixi əhəmiyyətinə görə diqqət çəkir. Burada Afrika xaricində indiyədək tapılmış ən qədim insan qalıqları aşkarlanıb. Bu isə alimlərin fikrincə, təxminən 2 milyon il əvvəl köç etməyə başlayan Homo erectus növünün həyat tərzi və miqrasiya yolları barədə yeni məlumatlar təqdim edir.

İlya Dövlət Universitetinin daş dövrü arxeologiyası üzrə professoru Giorgi Bidzinaşvili bildirib:

“Orozmanidən tapılan ilkin insan və heyvan qalıqlarının öyrənilməsi bizə Avrasiyanın ilk sakinlərinin həyat tərzi haqqında mühüm bilgilər verəcək. Biz düşünürük ki, Orozmani insanlığın tarixini anlamaq üçün çox böyük informasiya təqdim edə bilər”.

Tapıntı Tbilisidən təxminən 100 km cənub-qərbdə aşkarlanıb. Qeyd edək ki, 2022-ci ildə həmin bölgədə erkən insanlara aid diş qalıqları tapılmış, yaxınlıqdakı Dmanisi kəndində isə əvvəllər 1,8 milyon illik insan kəllələri üzə çıxarılmışdı.

Son qazıntılar zamanı həmçinin qılıncdişli pələng, fil, canavar, maral və zürafəyə aid qalıqlar, eləcə də daş alətlər aşkar edilib. Alimlərə görə, bu materialların öyrənilməsi erkən insanların Afrikanı tərk etdikdən sonra necə qidalandıqları və hansı iqlimdə yaşadıqları barədə mühüm suallara cavab verə bilər.

Orozmanidə hər il yeni Homo erectus qalıqları aşkar edilir. Qazıntılarda iştirak edən amerikalı antropologiya məzunu Miles Alexandre təəssüratını belə bölüşüb:

“Qazıntının ikinci günü balaca bir topuq sümüyü tapdım. Bəzən sadəcə bir neçə santimetr qazmaq kifayətdir ki, yeni bir kəşf ortaya çıxsın.”