III ixtisas qrupunun müsabiqə vəziyyəti haqqında vacib məlumatlar açıqlanıb. 

“Azərbaycan müəllimi”nin məlumatına görə, Dövlət İmtahan Mərkəzinin sədri Məleykə Abbaszadə abituriyentlərə videomüraciətində bildirib ki, bu qrupda abituriyentlərin sayı plan yerlərindən çoxdur:

"Bir çox abituriyentlər ixtisas seçimini hələ 8-ci, 9-cu sinifdə edərək III qrupu seçsə də, burada həmişə yüksək səviyyəli müsabiqə şəraiti formalaşır. Bu il də istisna deyil. III qrupda iki alt qrup mövcuddur. DT (Dil-Tarix) alt qrupunda imtahanın ikinci mərhələsində balı 100-dən az olmayan və ümumi nəticəsi 200 baldan yuxarı olan abituriyentlərin sayı 19 min 995 nəfərdir. Halbuki DT üzrə dövlət planında ayrılan yerlərin sayı 13 min 558-dir. Bu isə o deməkdir ki,  III qrupa sənəd verən təxminən 6 min nəfərin ali məktəbə qəbul olunmayacağı indidən məlumdur”.

Məleykə Abbaszadə orta nəticə göstərən abituriyentlərə tövsiyə edib ki, ixtisas seçiminin birinci mərhələsində siyahılarını çox ciddi şəkildə tərtib etsinlər və öz istəklərini nəzərə alaraq real nəticələrə əsaslanıb seçim etsinlər:

“Çünki müsabiqə vəziyyəti çox yüksəkdir. İxtisas qrupunun DT alt qrupunda dövlət sifarişli yerlərin sayı 3 953-dür. Yəni təxminən 4 min yerə 20 minə yaxın abituriyent müsabiqəyə qatılacaq. Ona görə də ötən və cari ilin keçid ballarının dəyişməsini nəzərə almaq vacibdir. 600 baldan yuxarı nəticə göstərənlərin sayı bu il 1 005 nəfərdir, ötən il isə 972 nəfər idi. Bu o deməkdir ki, yüksək bal tələb edən ixtisaslarda vəziyyət ötən ilki səviyyədə qalacaq və keçid ballarında ciddi dəyişiklik gözlənilmir”.