“AzerGold” QSC bir sıra yerli ali və peşə təhsili müəssisələri ilə əməkdaşlıq edir.

“Azərbaycan müəllimi” xəbər verir ki, bunu “AzerGold” QSC-nin İdarə Heyətinin sədri Zakir İbrahimov bu gün 4-cü Təqaüd Proqramı Müsabiqəsi qaliblərinin mükafatlandırılma və “Mədən topoqrafiyası” kitabının təqdimatı ilə bağlı təşkil edilən tədbirdə deyib. 

O bildirib ki, mütəxəssislərin ixtisas biliklərinin artırılması, təhsil, elm, istehsalat sahəsində qarşılıqlı maraq doğuran birgə fəaliyyətin təşkili məqsədilə  8 yerli təhsil müəssisəsi ilə əməkdaşlıq memorandumu və protokolu imzalanıb və buna uyğun işlər aparılır. İlk memorandumlar 2017-ci ildə Azərbaycan Dövlət Neft və Sənaye, Azərbaycan Dövlət Memarlıq və İnşaat universitetləri ilə imzalanıb:

“2018-ci ildən Azərbaycan Diplomatik Akademiyası, 2019-cu ildən isə Azərbaycan Dövlət Aqrar,  Azərbaycan Texniki və Bakı Dövlət universitetləri ilə əməkdaşlığa start verilib. 2021-ci ildən isə Azərbaycan Texniki Universiteti və Bakı Ali Neft Məktəbi ilə əməkdaşlığa başlamışıq”.

Sədr əlavə edib ki, ali məktəblərlə əldə olunmuş razılaşmalara uyğun olaraq, müvafiq sahə üzrə təhsil alan tələbələrin QSC-nin Daşkəsən rayonunda yerləşən Çovdar İnteqrəolunmuş Regional Emal Sahəsinə mütəmadi səfərləri təşkil olunur. Beləliklə, ali məktəblərdə elmi-nəzəri biliklərə yiyələnən tələbələr istehsalat sahəsində də təcrübə əldə edirlər. 

“Səhmdar Cəmiyyətin mütəxəssisləri tələbələrə mühazirələr oxuyur, ustad dərsləri keçir, eləcə də müxtəlif müsabiqələr, stimullaşdırıcı tədbirlər təşkil edirlər. Təcrübəsini uğurla tamamlamış tələbələrə QSC-nin sertifikatları təqdim olunur. Elan edilmiş müvafiq vakansiyalara uyğun işçilərin cəlb edilməsində təcrübə proqramlarında iştirak etmiş məzunlara üstünlük verilir. İndiyə kimi 230 nəfər ali məktəb, 33 nəfər peşə məktəbi tələbəsi cəmiyyətdə istehsalat təcrübəsinə cəlb edilib. İstehsalat təcrübəsi dövründə tələbələrə hər ay 300 manat ödənilir. İndiyədək həmin tələbələrin 32-si işə qəbul edilib”,- deyə Zakir İbrahimov diqqətə çatdırıb.