Sertifikatlaşdırma prosesi həm də maraqlı anlarla yadda qalıb.

"Azərbaycan müəllimi" xəbər verir ki, Qax şəhər Dilarə Əliyeva adına 1 nömrəli tam orta məktəbin kimya müəllimi Firuzə Əhmədovanı imtahandan öncə gözündən arı sancıb.

Yaxınları ona imtahana qatılmamağı tövsiyə etsə də, müəllim prosesdə iştirak edib və 55 bal toplayaraq Qax rayonunda öz fənni üzrə birinci olub.

Biz də Firuzə Əhmədova ilə əlaqə saxlayaraq onunla həmsöhbət olmaq, imtahanla bağlı təəssüratlarını öyrənmək istədik.

Firuzə müəllim söhbətə çox pozitiv başladı və bir anda o müsbət enerjisini bizə də ötürməyə müvəffəq oldu.

"Tək gözlə imtahandan 55 bal topladım. İmtahanda hər səviyyədən suallar var idi. İlk 30 sualı bitirəndə cəmi 22 dəqiqə keçmişdi. Proses tam şəffaf şəkildə keçdi. Düşünürəm ki, fənnini bilən və vaxtı düzgün dəyərləndirən hər bir müəllim yaxşı nəticə göstərə bilər".

Firuzə Əhmədova 2011-ci ildə Bakı Dövlət Universitetinin Kimya fakültəsindən məzun olub. 2020-ci ildə MİQ imtahanından keçərək Qaxın Qorağan kəndində müəllimlik fəaliyyətinə başlayıb. Ötən il isə yenidən MİQ imtahanında iştirak edib və 89,6 bal toplayaraq iş yerini Qax şəhər 1 nömrəli tam orta məktəbinə dəyişib.

Firuzə müəllimlə söhbət edərkən dərslərini təcrübələr əsasında keçdiyini, şagirdləri ilə birgə maraqlı təcrübələr apardığını da öyrəndik. Ona fəaliyyətində uğurlar arzu edir, nailiyyətlərinin davamlı olmağını arzulayırıq.