Naxçıvanda ilk dəfə olaraq “Maarifçi” tələbə-məzun təcrübə proqramının icrasına başlanılıb. Uğurlu namizədlər Naxçıvan Muxtar Respublikası Təhsil Nazirliyində təcrübə proqramına qoşulublar.

Təcrübə proqramının iştirakçılar təəssüratlarını "Azərbaycan müəllimi" ilə bölüşüblər.

Fatimə Rəhimova Naxçıvan Müəllimlər İnstitutunun məzunudur:

"Öncəliklə qeyd edim ki, bu proqramı ilk dəfə olaraq Naxçıvan MR Təhsil Nazirliyinin rəsmi səhifəsində gördüm. Öz-özümə "Niyə də olmasın?" deyərək və ən əsası da özümə güvənərək qeydiyyatdan keçdim. Bu gün mən özümü çox şanslı hiss edirəm. Səbəb isə ölkə üzrə 2741 namizəd arasında uğur qazanan 4 nəfərdən biri olmağımdır. Biz artıq təcrübəmizi Naxçıvan MR Təhsil Nazirliyində həyata keçiririk. Burada səmimiyyətlə qarşılanmağımızın, rəhbərlik tərəfindən söhbət aparılmasının, bizim adaptasiyamızı daha da sürətləndirəcəyinə inanıram. Düşünürəm ki, bu proqram yeni təcrübə əldə etmək üçün  yaxşı fürsətdir. Proqramı uğurla həyata keçirməklə gələcəkdə təhsil islahatlarının birbaşa icraçılarından biri olmaq istəyirəm.

Naxçıvan Dövlət Universitetinin 4-cü kurs tələbəsi Rəşad Rüstəmov da proqramın iştirakçısı olduğu üçün sevinclidir.

"İnanıram ki, təcrübəmizi həyata keçirdiyimiz Naxçıvan Muxtar RespublikasıTəhsil Nazirliyində bu sahə üzrə müxtəlif təcrübələrəldə edib, komanda ilə iş bacarığına sahib olacağıq. Bu təcrübə bizim gələcəkdə iş həyatına başlayanda köməyimizə çatan mükəmməl vasitədir".

"Düşünürəm ki, 3 ay müddətində keçirdiyimiz təcrübə növbəti iş həyatımıza böyük fayda verəcək", - deyən magistr Kənan Hüseynəliyev də proqrama qəbul edilənlərdən biridir.

"Mən hər iki mərhələdə uğur qazanmışam. Bizim gələcəyimiz üçün bu proqram böyük təşəbbüsdür. Çox sevindirici haldır ki, Naxçıvanda da belə bir layihəyə başlanılıb. Burdan tələbə həmkarlarımıza səslənirəm ki, hər zaman məqsədə və uğura gedən yola doğru addımlasınlar. Mən də belə etdim və nəticə olaraq bu gün seçilən 4 nəfərdən biriyəm".

"Sahə üzrə biliyim olduğu üçün əmin idim ki, imtahanda uğurlu nəticə əldə edib, seçiləcəyəm". Bu fikirləri bildirən Nurcahan Məmmədova isə qeyd edir ki, ən böyük dəstəkçiləri valideynləridir.

Nurcahan, eyni zamanda, diqqətə çatdırdı ki, təhsil sahəsinin dərinliklərini öyrənib, bu sahə üzrə mütəxəssis olmaq gələcək məqsədləri sırasındadır.

"Üç ay davam edən təcrübə sonrası inanıram ki, istədiyimiz nəticəni əldə edəcəyik. Seçilməyimiz bizi daha çox ruhlandırır və bu işə həvəsləndirir".