Fevralın 12-də “Məktəbdənkənar təhsil: Çağırışlar və perspektivlər” mövzusunda ilk respublika konfransı keçirilib.

"Azərbaycan müəllimi" xəbər verir ki, konfransın məqsədi məktəbdənkənar təhsilin əhəmiyyətini vurğulamaq, bu sahədə mövcud və beynəlxalq çağırışları müzakirə etmək, onların həlli yollarını araşdırmaq, yerli təcrübə mübadiləsini təmin etmək və gələcək perspektivləri müəyyənləşdirmək olub.

Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov çıxışında normativ-hüquqi bazanın təkmilləşdirilməsinin vacibliyini vurğulayıb:

"Hazırda istifadə etdiyimiz sənədlərin əksəriyyəti 1990-cı illərin əvvəllərində qəbul olunub. Son 20-30 ildə ictimai münasibətlərdə və təhsil sahəsində ciddi dəyişikliklər baş verib. Ümumi və ali təhsil sahəsində yeni normativ sənədlər qəbul edilsə də, məktəbdənkənar təhsil sahəsində bu istiqamətdə ciddi dəyişikliklər aparılmayıb. Bu səbəbdən əsas prioritetimiz məhz bu olmalıdır. Artıq xeyli sayda sənəd hazırlanaraq Elm və Təhsil Nazirliyinə və digər aidiyyəti qurumlara təqdim edilib”.

Daha sonra çıxış edən MÜTDA-nın Məktəbdənkənar fəaliyyətin təşkili sektorunun müdiri Nilüfər Rəhimova məktəbdənkənar təhsil müəssisələrində işə qəbul qaydaları və çalışanların peşəkar fəaliyyətinin qiymətləndirilməsi ilə bağlı hazırlanmış normativ sənədlər barədə məlumat verib.

Elm və təhsil nazirinin müşaviri Rüstəm Ağayev isə məktəblərdə pilot layihə çərçivəsində idman növləri üzrə məktəbdənkənar fəaliyyətlərin təşkili barədə danışıb. O, həmçinin məşqçi-müəllimlərin işə qəbulu ilə bağlı tətbiq ediləcək yenilikləri açıqlayıb.

Konfrans panel müzakirələrlə davam edib, iştirakçıların sualları cavablandırılıb.