Bacarıq boşluqları olduqca real və əhəmiyyətlidir. Həm məzunların, həm də işəgötürənlərin fikrincə, məzunlar çox vaxt ehtiyac duyduqları bacarıqlara və işəgötürənlərin tələb etdiyi qabiliyyətlərə malik olmurlar. Lakin tələbələrin ali təhsil zamanı ehtiyac duyduğu bacarıqlar və təkmilləşdirmələr haqqında konkret fikirlər mövcuddur.

“Azərbaycan müəllimi” xəbər verir ki, “Forbes” jurnalı tələbələrin ehtiyac duyduğu ən önəmli 5 bacarıq haqqında məqalə hazırlayıb.

Məqalədə qeyd edilir ki, təhsilin əsas prioritetlərindən biri davamlı təkmilləşmədir. Bundan əlavə, iş bazarının gələcəyi göstərir ki, istedad çatışmazlığı ilə üzləşməyə davam edəcəyik və işəgötürənlər güclü bacarıqları olan işçilər tapmaq üçün mübarizə aparacaqlar. Məzunların 87 faizi bakalavr təhsili ilə müqayisədə işəgötürəndən daha yaxşı iş təhsili aldıqlarını deyir. İnsan resursları üzrə mütəxəssislərin 96 faizi isə deyir ki, universitetlər tələbələri iş dünyasına hazırlamaq üçün daha çox məsuliyyət daşımalıdır.

Tələbələrin ehtiyac duyduğu və biznes dünyasının tələb etdiyi bacarıqlar:

1.Real dünya təcrübəsi

Əsas problemlərdən biri real dünya təcrübəsinin olmamasıdır. Əslində, işəgötürənlərin 75 faizi kolleclərin və universitetlərin insanları işə hazırlamadığını, xüsusən də onların 60 faizi ali təhsilin tələbələri real dünya təcrübəsi ilə lazımi səviyyədə hazırlamadığını bildirir. Sorğuya əsasən, işəgötürənlərin 91 faizi məzunların real problemləri həll etməyi bacarmalı olduqlarını deyir, amma məzunların yalnız 40 faizi bu istiqamətdə təhsil aldıqlarını bildirir. Məzunların 85 faizi isə kollec və ya universitetlərin onları iş yerlərində təcrübə üçün daha yaxşı hazırlamasını arzulayır.

2.Qlobal düşüncə tərzi

İşəgötürənlərin 91 faizi məzunların qlobal düşüncə tərzinə ehtiyac duyduqlarını bildirir, lakin məzunların yalnız 39 faizi bu istiqamətdə hazırlığı kollec və universitetlərdən aldıqlarını bildirib. 

3.Qarşılıqlı fəaliyyət və komandada yaxşı işləmək bacarığı

İşəgötürən respondentlərin 91 faizi qeyd edir ki, komandada yaxşı işləmək bacarığı çox vacibdir. Ancaq yenə də sorğuda iştirak edən məzunlar bu təhsili almadıqlarını bildirirlər.

Bununla əlaqədar olaraq, işəgötürənlər insan və şəxsiyyətlərarası bacarıqların inkişafına yüksək əhəmiyyət verdiklərini bildirirlər. O cümlədən:

– Ünsiyyət (98%)

– Maraq və öyrənmək istəyi (93%)

– Əməkdaşlıq (92%)

– Yaradıcılıq (90%)

– Tənqidi düşüncə (87%)

İnsanların qabiliyyətləri və qarşılıqlı əlaqə bacarıqları iş prosesində mühüm əhəmiyyət kəsb edir, çünki bu onlara münasibətlərin qurulmasında, etimadın yaradılmasında, ideyaları bölüşməkdə, komandada işləməkdə kömək edir.

4. Süni intellekt və texnoloji bacarıqlar

Digər prioritet ali təhsil müəssisələrinin süni intellekt və texnologiya sahəsində təhsil verməsidir, çünki süni intellekt gələcəyin iş dünyasını əhəmiyyətli dərəcədə dəyişəcək. Əslində, sorğuda iştirak edən məzunlar süni intellekt təhsilinin onlara daha məhsuldar və səmərəli (88%), eləcə də daha innovativ (82%) və qərar qəbul etmə və problemlərin həllində daha yaxşı (80%) olmasına kömək edə biləcəyini bildirirlər. Məzunların 80 faizi süni intellektin onların işinin keyfiyyətini artıra biləcəyini söyləyir.

İşəgötürənlər də bu qabiliyyəti prioritet görürlər. Təəssüf ki, məzunların 44 faizi bu təhsili aldığını desə də, yalnız 20 faizi ehtiyac duyduqları biliyə tam malik olduğunu söyləyir. 87 faizi isə bu sahədə daha çox təlim keçməyi arzuladığını bildirib.

Süni intellekt təhsili almış məzunların 94 faizi bunun karyeralarını qurmaqda çox kömək etdiyini bildirib. 

5. Karyera və ixtisas seçimində mütəxəssis köməyi

Kollec və universitetlərin tələbələrə çatdırmalı olduğu vacib sahələrdən biri də maraqlar, karyera istiqaməti üzrə mütəxəssislərdən yardım dəstəyidir. Hesabatda məzunların 94 faizinin ixtisas seçiminə görə peşman olduğu görünür və onlardan 43 faizi səhv ixtisas seçdikləri üçün uğursuzluğa məhkum olduğunu düşünür, 84 faizi isə bunun onların maliyyə gələcəyinə təsir etdiyini bildirib.

Bundan əlavə, respondentlərin 82 faizi bunun onların psixi sağlamlığına mənfi təsir etdiyini bildirirlər. Sorğuda iştirak edən məzunların 64 faizi başqa bir sahədə ixtisaslaşmağı arzulayır.

Həm məzunlar, həm də işəgötürənlər kollec və universitetlər tərəfindən davamlı təkmilləşdirmə işlərinin aparılmasına ehtiyac olduğunu etiraf edirlər.