Artıq bir neçə müddətdir ki, Respublika fənn olimpiadalarının (RFO) qalibləri haqqında silsilə yazılar yayımlayırıq. Bu yazılarda şagirdlərin qələbəni heç də asanlıqla qazanmadıqları, gələcək planları və göstərdikləri əzm öz əksini tapır.

“Azərbaycan müəllimi” bu dəfə Milli Qəhrəman Mübariz İbrahimov adına Biləsuvar Təhsil Kompleksi və Biləsuvar şəhər Kəmaləddin Ağayev adına Texniki fənlər təmayüllü internat tipli məktəb-liseyin RFO-da qalib olan şagirdləri ilə söhbətləşib.

“Həkim olmaq istəyirəm”- Üçqat qalib

İlk müsahibimiz RFO-nun üçqat qalibi Şövqi Əlizadədir. O, Azərbaycanın Milli Qəhrəmanı Mübariz İbrahimov adına Biləsuvar Təhsil Kompleksinin 11-ci sinif şagirdidir. Bu tədris ilində RFO-da biologiya fənni üzrə gümüş medala layiq görülüb:

“RFO-da ilk dəfə 9-cu sinifdə iştirak etmişəm. Biologiya fənninə həvəsim olduğundan bu müsabiqədə iştirak etməyə qərar verdim. Olimpiadaya fənn müəllimim və liseyin biologiya fənni üzrə olimpiada müəllimi Vəfa Xankişiyeva ilə hazırlaşırdım. Xarici ədəbiyyatlardan oxuyur və keçmiş illərin beynəlxalq olimpiada suallarını işləyirdim. Qalib olacağıma inanırdım, çünki yaxşı hazırlaşmışdım. 9 və 10-cu sinifdə RFO-da bürünc medala layiq görülmüşəm. Həmçinin buraxılış imtahanında 285 bal toplamışam. Gələcəkdə həkim olmaq istəyirəm”.

“Bütün fənləri sevirəm” - Üçqat qalib

Daha bir üçqat qalibimiz Asi Paşazadədir. Biləsuvar Təhsil Kompleksinin 11-ci sinfində təhsil alan Asi builki RFO-da bürünc medal qazanıb:

“Ümumiyyətlə, bütün fənləri sevirəm. Lakin riyaziyyat və biologiyaya həmişə xüsusi marağım olub. Bu fənlərdən biri üzrə olimpiadada iştirak etməyimin həmin elmi dərindən öyrənməyimdə böyük rolunun olacağını düşündüm. Seçmək istədiyim ixtisasla əlaqəli olduğu üçün biologiya fənnini seçdim. Müsabiqəyə biologiya müəllimim Vəfa Xankişiyeva ilə hazırlaşdım. Lakin keçən illərdən fərqli olaraq, bu il əsasən vaxtımı buraxılış və blok fənlərinə ayırdım. İnanırdım ki, qalib olacağam. Bunun əsas səbəbi kimi 9 və 10-cu siniflərdən gələn təcrübəmi göstərə bilərəm. 2023 və 2024-cü illərdə RFO-da 2 gümüş medal sahibi olmuşam. 2024-cü ildə həm də “Sabahın alimləri” müsabiqəsində gümüş medal qazanmışam. 9-cu sinif buraxılış imtahanında 287 bal, 11-ci sinif buraxılış imtahanında isə 297.3 bal toplamışam. Keçən il Beynəlxalq Biologiya Olimpiadası dərslərinə qatılmaq hüququ əldə etmişəm. Tibb təhsili alaraq ürək cərrahı olmaq istəyirəm. Gələcək fəaliyyətimlə ölkəmizi dünyada təmsil etmək əsas hədəflərimdəndir”.

“Seçdiyim coğrafiya sahəsi üzrə savadlı mütəxəssis olmaqdır”- İkiqat qalib

Orxan Quliyev Kəmaləddin Ağayev adına Texniki fənlər təmayüllü internat tipli məktəb-liseyin 10-cu sinif şagirdidir. RFO-da coğrafiya fənni üzrə yuxarı yaş qrupu üzrə ikiqat bürünc medalçıdır. O, təəssüratlarını bizimlə bölüşür:

“Məndə bu olimpiadaya ilk marağı coğrafiya müəllimim Günay Hüseynli yaratdı. 2023-cü ildə müəllimim məndə coğrafiya üzrə xüsusi istedadımın olduğunu deyib məni bu olimpiadaya yönləndirdi. Həmin il çox güclü hazırlaşaraq coğrafiya fənni üzrə bürünc meda qazandım. Eyni uğuru bu il də təkrarlayaraq coğrafiya fənni üzrə yenidən bürünc medal əldə etdim. RFO-ya hazırlaşmaq çox ağır, eyni zamanda, maraqlıdır. Proses çətin olsa da, müəllimimin mənə motivasiya çətinliklərimi unutdururdu. Bu uğuru qazanmağımın əsl səbəbkarı müəllimim Günay Hüseynli olub. Onun bu qədər şagirdin arasından məni kəşf etməsi həyatımda böyük dəyişikliklər etdi. Məni təmənnasız şəkildə dayanmadan hazırlaşdıraraq məqsədimə çatmağıma yardım etdi. Hər zaman özümdən narazı qalmışam, fikirləşmişəm ki, daha az bilirəm və daha çox oxumalıyam. Ancaq müəllim mənə hər zaman qalib gözü ilə baxıb, tam o ruhda məni yetişdirirdi. Onun sayəsində özünəgüvənim formalaşdı. Qazandığım medalın ən böyük faydası odur ki, bu medal vasitəsilə müvafiq ixtisaslara müsabiqədənkənar qəbul olacağam. Gələcəkdə coğrafiya sahəsi üzrə savadlı mütəxəssis olmaq və bu sahəni daha dərindən öyrənib inkişaf etdirməkdir”.