II ixtisas qrupu üzrə keçirilən qəbul imtahanında ölkəmizdə ən yüksək nəticəni 388.3 bal toplayan Bakı şəhər Suraxanı rayonu 89 saylı tam orta məktəbin məzunu Mansurov Eldar Ramiz oğlu göstərib. O, imtahanın birinci mərhələsində 278.7 bal toplamağa müvəffəq olub.

Eldar imtahan haqqında təəssüratlarını “Azərbaycan müəllimi” nə danışıb.

Həmsöhbətimiz yüksək nəticə göstərəcəyini gözlədiyini, lakin respublika üzrə birinciliyinin onun üçün sürpriz olduğunu qeyd edir. Onun sözlərinə görə, uğurlu olmağın ən birinci yolu məsuliyyətli olmaqdır: “Hər bir işə məsuliyyətlə yanaşmaq lazımdır”.

İmtahanın onun üçün çox da asan olmadığını, bununla belə sualların proqrama uyğun olduğunu deyən abituriyent test suallarının açıq suallardan daha düşündürücü olduğunu bildirir: “İmtahanlara hazırlıq dövründə telefondan, sosial şəbəkələrdən uzaq olmuşam, qarşıma məqsəd qoymuşam və bu məqsədə doğru irəliləmişəm. II ixtisas qrupunu seçməyimin səbəbi bu qrupdakı fənləri daha çox sevməyim və iqtisadiyyat, maliyyə ixtisaslarına olan marağımdır. Boş vaxtlarımı dostlarımla keçirməyi xoşlayıram”.

Ölkə birincisi uğurlarının əldə edilməsində müəllimlərinin və ailəsinin böyük rolu olduğunu vurğulayır: “Mənim qazandığım bu uğurda müəllimlərimin çox böyük əməyi var. Ailəm də mənə mənəvi cəhətdən çox dəstək olub. Mənim iki bacım var, biri BDU-nun, digəri isə ADPU-nun tələbəsidir. Onlar da mənə çox böyük dəstək oldular, mənə məsləhətlər verdilər”.

Eldar Mansurov bildirir ki, maliyyə ixtisası üzrə təhsil almaq istəyir və seçimi iki universitet üzrədir: “Hazırda ADA və BANM universitetləri arasında seçim qarşısında qalmışam. İxtisas olaraq mliyyəni seçmək fikrindəyəm. Gələcəkdə vətənimizə, xalqımıza layiqli bir mütəxəssis olmaq istəyirəm. Şagirdlərə də tövsiəm odur ki, qarşılarına məqsəd qoysunlar və bu məqsədə doğru inamla irəliləsinlər”.