Bakı Şəhəri üzrə Təhsil İdarəsinin (BŞTİ) "Dəyərlərimizi qoruyaq" layihəsi çərçivəsində "Ölkələri tanıyaq və tanıdaq" mövzusunda silsilə tədbirlər keçirilib.

İdarədən “Azərbaycan müəllimi”nə bildirilib ki, paytaxtdakı 27 nömrəli tam orta məktəbdə təşkil olunan "Ölkələri tanıyaq və tanıdaq" layihəsinin əsas məqsədi ibtidai sinif şagirdlərini Azərbaycanla yanaşı digər ölkələrin tarixi, mədəniyyəti, incəsənəti, idmanı, adət-ənənələri barədə məlumatlandırmaqdan ibarətdir.

Belə ki, layihə çərçivəsində Çin, İngiltərə, Türkiyə, Avstriya, İsveç, Çexiya və digər ölkələrə həsr olunan tədbirlərdə Azərbaycanla həmin ölkələrin əlaqələrinin tarixindən, sürətlə inkişaf etdirilən əməkdaşlıqdan danışılıb.

Tədbirlərdə şagirdlərin ifasında Azərbaycanın və digər ölkələrin rəqsləri və adət-ənənələrini əks etdirən ədəbi-bədii kompozisiyalar nümayiş olunub, ölkələrin sənət incilərinə, mədəni zənginliklərinə, milli mətbəxinə həsr olunan guşələrə baxış keçirilib.

Layihə çərçivəsində şagirdlər xarici ölkələrin zəngin mədəniyyəti, adət-ənənələri və həyat tərzini əks etdirən maraqlı çıxışlar təqdim ediblər.

Qeyd edək ki, ibtidai sinif şagirdlərinin fəal iştirakı ilə keçirilən tədbirlər onların dünyagörüşünün, təqdimat bacarıqlarının və mədəni dəyərlərə yanaşmasının formalaşmasına müsbət təsir göstərir.