Özbəkistan ümumi orta təhsil sistemini 12 illik modelə keçirməyə hazırlaşır. 

“Azərbaycan müəllimi” xəbər verir ki, yenilik çərçivəsində 6 yaşlı uşaqlar üçün nəzərdə tutulan hazırlıq mərhələsi də məktəb strukturuna daxil ediləcək. Məqsəd ölkə təhsilini beynəlxalq standartlara uyğunlaşdırmaq və məzunların xarici universitetlərə qəbulunu asanlaşdırmaqdır.

Özbəkistan məktəbəqədər və məktəb təhsili nazirinin müavini Sardor Rəcəbovun sözlərinə görə, artıq hazırlıq qrupları demək olar ki, bütün uşaqları əhatə edir və mərhələli şəkildə məktəb sisteminə inteqrasiya olunacaq. Onun fikrincə, bu dəyişiklik məzunların xarici universitetlərdə əlavə birillik “foundation” kurslarına ehtiyacını aradan qaldıracaq.

Rəsmi açıqlamaya əsasən, hazırkı 11 illik sistem beynəlxalq təcrübəyə uyğun gəlmir və məzunların ali təhsilə sistemli şəkildə hazırlanması üçün mexanizmlər zəifdir. Statistikaya görə, hər il 15 minə yaxın məzun xaricdə əlavə bir il təhsil almağa məcbur olur. Halbuki PISA 2022 nəticələrinə görə, ən yaxşı göstəricilərə malik 20 ölkənin 85 faizində ümumi təhsil 12 illikdir.

Yeni struktur belə olacaq:
– 1 il hazırlıq mərhələsi və 4 il ibtidai təhsil;
– 5 il əsas orta təhsil (5–9-cu siniflər);
– 2 il tam orta təhsil (məktəblərdə, akademik liseylərdə, hərbi məktəblərdə və ya texniki kolleclərdə).

Hazırlıq sinifləri 3666 məktəbdə və 1013 dövlət məktəbəqədər müəssisəsində təşkil olunacaq. Müəllimlərin hazırlıq mərhələsinə uyğun proqramlarla təlimi də nəzərdə tutulub.

İslahat nəticəsində Özbəkistan təhsil sistemi UNESCO-nun ISCED-2011 beynəlxalq standartlarına uyğunlaşdırılacaq. Bunun üçün “Təhsil haqqında” və “Məktəbəqədər təhsil və tərbiyə haqqında” qanunlara dəyişiklik ediləcək.