Xəbər verdiyimiz kimi, 2024-2025-ci tədris ili üzrə qəbul imtahanlarında kənd rayonlarının bəzi məktəbləri bir neçə fənn üzrə əldə etdikləri yüksək nəticələrə görə ölkənin seçilən təhsil müəssisələrindən olublar. 

Onlardan 3-ü Şirvan-Salyan Regional Təhsil İdarəsinin tabeliyində fəaliyyət göstərən təhsil müəssisəsidir.

"Azərbaycan müəllimi" yüksək göstəricilərinə görə xüsusi fərqlənən məktəblərin müəllimləri ilə görüşüb.

“Güclü potensiala malik kollektivlə çalışıram”

İlk olaraq kimya fənni üzrə fərqlənən Biləsuvar rayonu Aydın Həsənov adına Bağbanlar kənd tam orta məktəbinə yollanırıq. Məktəbin kimya müəllimi Aytən Eyvazovanın sözlərinə görə, 2008-ci ildən bu məktəbdə fəaliyyət göstərir:

"Məktəbimizin ön sıralarda olması mənim üçün qürurvericidir. Əsas məqsəd şagirdlərə doğru istiqamət vermək, onları stimullaşdırmaq, fikirlərinə hörmətlə yanaşıb marağını nəzərə almaq lazımdır. Bacardığım qədər hər şagirdə fərdi yanaşaraq dəstək oluram. RFO-da və RFM-də uğur qazanan şagirdlərim çox olub. Güclü potensiala malik kollektivlə çalışıram. Məqsədimiz gələcəyə ümidlə baxan vətənpərvər ruhlu şagirdlər yetişdirməkdir".

“Hər uşağı öz ritmi ilə inkişaf etdirməliyik”

Daha bir müsahibimiz fizika fənni üzrə fərqlənən Neftçala rayonu Ağaşirin Cəfərov adına Astanlı kənd tam orta məktəbin müəllimi Pikə Ağaverdiyevadır. Pikə müəllim 2008-ci ildən fizika fənni üzrə pedaqoji fəaliyyətə başlayıb:

"2021-ci ildən məktəbin tədris işləri üzrə direktor müavini işləyirəm. Mənim üçün müəllimlik sadəcə peşə deyil, nəfəs aldığım, rahat olduğum bir həyat tərzidir. Mən şagirdlərə yalnız fizika elminin dərinliyini deyil, onlara insan olmağı öyrətməyə çalışıram. Onlarla şagirdimi bu peşəyə sahib olmağı öyrətməyə çalışmışam. Əgər öyrətdiyim hər bir şagirdin yaddaşında qalmışımsa, bu mənim üçün fəxr və qürurdur. İndiyə kimi yetirmələrimin mühüm vəzifələrdə çalışmaları mənim üçün çox sevindirici haldır. Bu peşəyə marağım uşaqlıqdan yaranıb. Şagird olanda həmişə müəllimlərimə böyük hörmət bəsləyirdim. Hələ məktəbdə oxuyarkən onların şagirdlərə göstərdiyi qayğı, tədrisə marağı artırması, eyni zamanda, hazırda məktəbimizin direktorunun müəllimlərə verdiyi stimul bizim fənnimizə qarşı sevginin daha da artmasına səbəb olub. Hər şagirdin fərdi xüsusiyyətlərinə bələd olmaq və onun potensialını vaxtında hiss etmək əsasdır. Hamıya eyni yanaşmaq düzgün deyil, hər uşaq fərqli olduğuna görə onları öz ritmi ilə inkişaf etdirməliyik. Mən bütün müəllimlərə səbirli olmağı, şagirdlərinə fənlərini sevdirməyi, daima özlərini inkişaf etdirməyi və hər bir şagirdin müəlliminə etibar etməsini arzu edirəm. Belə  məqamlara əhəmiyyət verəriksə, təhsilimizin daha da inkişaf edəcəyinə ümid bəsləmək olar".

“Qəbul imtahanlarında, fənn olimpiadalarında şagirdlərimiz tarixdən hər zaman yüksək nəticələr əldə ediblər”

Söhbətimizi tarix fənni üzrə fərqlənən Salyan rayonu Ramiz Qafarov adına Marışlı kənd tam orta məktəbinin müəllimi Xuraman Nəcəfova ilə davam etdiririk. O deyir ki, məktəbləri rayonun kənd məktəbləri arasında, demək olar ki, hər il yüksək nəticələrinin olması ilə diqqət çəkir:

"Bu nəticəmiz də kollektiv olaraq hər birimizi sevindirir. Tədris etdiyim fənn üzrə şagirdlərimizin əldə etdiyi uğura, əlbəttə, sevinirəm. Qarşılıqlı çalışaraq əldə etdiyimiz bu nəticə illərlə çəkilən əziyyətin bəhrəsidir. Lütfi-zadənin dediyi kimi, hər uğurun arxasında qabiliyyət, zəhmət və israr durur”.

Müəllim əlavə edir ki, şagirdlərin diqqətini çəkmək üçün bir çox üsullardan istifadə edirəm. Şagirdlərə döyüşlər, tarixi şəxsiyyətlərin həyat və ya fəaliyyəti, tarixi məkanlar barədə əlavə məlumatlar verir, real hekayələri danışıram. Bu, şagirdlərdə dərsə marağı artırır. Xüsusilə kitablarda az rast gəlinən sitatlardan nümunə gətirmək onlarda həmişə dərsə maraq oyadır. Qəbul imtahanlarında, fənn olimpiadalarında şagirdlərimiz tarix fənnindən hər zaman yüksək nəticələr əldə ediblər. Məktəbimizin məzunları arasında tarix müəllimləri, hüquqşünaslar çoxdur".