Təhsilverənlərin sertifikatlaşdırılması prosesinin test imtahanı mərhələsinin ilk günü yekunlaşıb.

Məktəbəqədər və Ümumi Təhsil üzrə Dövlət Agentliyindən “Azərbaycan müəllimi”nə verilən məlumata görə, dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinin ilk günü başa çatıb.

İmtahan mərhələsi ölkənin 18 şəhər və rayonu üzrə ümumilikdə 39 imtahan mərkəzində təşkil olunub. Test imtahanında 2019 müəllim iştirak edib, davamiyyət göstəricisi isə 95 faiz təşkil edib.

Sertifikatlaşdırma prosesinin bu mərhələsi üzrə apellyasiya müraciətlərinin qəbuluna 19 iyun saat 12:00-dan etibarən start veriləcək. Proses və nəticələrlə bağlı hər hansı narazılığı və ya şikayəti olan təhsilverənlər portal.edu.az platformasının “Sertifikatlaşdırma” bölməsinə daxil olaraq müraciətlərini ünvanlaya bilərlər. Müraciətlərin qəbulu 19 iyul saat 12:00-dək davam edəcək. Təhlil prosesi başa çatdıqdan sonra yekun nəticələr elan olunacaq.

Qeyd edək ki, bəzən sosial media platformalarında sertifikatlaşdırma prosesi ilə bağlı həqiqəti əks etdirməyən və ictimaiyyətdə çaşqınlıq yaratmağa yönəlmiş qeyri-dəqiq məlumatlar paylaşılır. Qurum bu cür informasiyaların prosesin şəffaflığına və obyektivliyinə kölgə salmaq məqsədi daşıdığını bildirir və bütün ictimaiyyəti yalnız rəsmi mənbələrə istinad etməyə, təhsilverənlərin peşəkarlığının artırılması istiqamətində aparılan bu mühüm islahata dəstək olmağa çağırır.