İyunun 18-də Sumqayıt şəhər 1 nömrəli tam orta məktəbdə təşkil edilən sertifikasiya imtahanında maksimal 60 bal toplayan müəllimlər sevinclərini ilk olaraq "Azərbaycan müəllimi" ilə bölüşüblər.

Fərqanə Quliyeva 3 ildir ki, Hökməli qəsəbə tam orta məktəbində riyaziyyat müəllimi işləyir. 2020-ci ildə Bakı Mühəndislik Universitetinin "Riyaziyyat və informatika müəllimliyi" ixtisasını bitirdiyini söyləyən müəllim 2021-ci ildə MİQ imtahanında 53 bal toplayaraq müəllimlik fəaliyyətinə başladığını qeyd edir.

Çox həyəcanlı olan müəllim 60 bal toplamağını öz üzərində çox işləməsi ilə əlaqələndirir: "İxtisasım üzrə xüsusi hazırlaşmamışam, kurikulum üzrə isə 1 ay müddətində təlimçi ilə hazırlaşmışam. İmtahan sualları hər bir işləyən müəllimin yaza biləcəyi səviyyədə idi. İlk 30 sual mənə çox rahat gəldi. Kurikulum sualları arasında iki cavab üzərində qaldığım sual var idi, ona da düz cavab verdim və 60 bal topladım".

Müəllimlərə tövsiyəsində Fərqanə müəllim vurğulayır ki, həyəcanı kənara qoyub sualları diqqətlə cavablandırmaq lazımdır: "Sertifikasiya imtahanı düşündüyümüz kimi çətin deyil, hazırlıqlı müəllim üçün çox rahatdır".

Gülşən Şahverdiyeva 4 il Bakı Atatürk liseyində fəaliyyət göstərdikdən sonra 2023-cü ildə MİQ imtahanında iştirak edərək 70,075 bal toplayıb və Bakıdakı 103 nömrəli tam orta məktəbdə riyaziyyat müəllimi olaraq işə qəbul olunub. 

Dövlət məktəbində 3 illik pedaqoji staja malik olan müəllim sertifikasiya imtahanına hazırlaşarkən kurikulum üzrə video təlimləri dinlədiyini, Təhsil İnstitutunun paylaşdığı testləri işlədiyini qeyd edir: "İmtahanın gedişində öncə düşünərək sualları cavablandırırdım, sonra vaxt azlığını görüb sürətimi artırdım. Qaranlıq qalan suallara yenidən qayıdıb düzəlişlər etdim. Müəllimlərə tövsiyəm odur ki, diqqətli olsunlar, sonda cavablarını mütləq yoxlasınlar. Çünki mexaniki səhvlər edə bilərlər".