Bu gündən ölkə üzrə, o cümlədən Naxçıvan Muxtar Respublikasında dövlət ümumi təhsil müəssisələrində çalışan təhsilverənlərin sertifikatlaşdırılması prosesinin test imtahanı mərhələsinə başlanılıb.

“Azərbaycan müəllimi” test imtahanının təşkil olunduğu mərkəzlərdən birində - Naxçıvan şəhəri 4 nömrəli tam orta məktəbdə keçirilən infoturda iştirak edib. 

Məlumat üçün bildirək ki, sertifikatlaşdırmanın test imtahanı mərhələsinin ilk gününə Azərbaycan dili və ədəbiyyat, rus dili və ədəbiyyatı, riyaziyyat və xarici dillər üzrə tədris aparan təhsilverənlər cəlb olunub. Bugünkü test imtahanında Naxçıvan Muxtar Respublikasının ümumtəhsil müəssisələrində çalışan 59 müəllim iştirak edib. Prosesin ilk günündə 92% davamiyyət qeydə alınıb.

Naxçıvan Muxtar Respublikasının təhsil naziri Elxan Nəcəfov jurnalistlərə açıqlamasında deyib ki, proses bütün namizədlər üçün bərabər imkanlar əsasında təşkil edilib. İmtahanlar elektron formatda həyata keçirilir və hər bir iştirakçı imtahan bitdikdən sonra nəticələrini sistem üzərindən şəffaf şəkildə görə bilir: “İnanırıq ki, yaradılmış bu şərait və indiyədək müəllimlərimiz üçün təqdim edilən dəstək nəticə etibarilə uğurlu nəticələrə səbəb olacaq”.

İnfoturda iştirak edən Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova sertifikatlaşdırmanı olduqca vacib proses sayıb. 

İnfotur çərçivəsində imtahan prosesini izləyənlərdən biri olan Naxçıvan Dövlət Universitetinin Azərbaycan tarixi kafedrasının müəllimi Sevinc Abbasova bildirib ki, infoturda iştirak onun üçün həm peşəkar, həm də şəxsi baxımdan olduqca əhəmiyyətlidir: “Bu gün təşkil edilən infoturda müşahidəçi qismində iştirak etmək, Təhsil Nazirliyinin bizim üçün yaratdığı şəraitlə birbaşa tanış olmaq, şəffaflığı görmək, dövlət qurumlarının və nümayəndələrinin prosesə yaxından cəlb olunmasını müşahidə etmək — bütün bunlar təhsilimizin gələcəyinin etibarlı əllərdə olduğunu göstərir”.

Qeyd edəki, test imtahanında azı 30 bal toplamış təhsilverənlər sertifikatlaşdırmanın müsahibə mərhələsinə keçmək hüququ qazanacaqlar. Sertifikatlaşdırmanın nəticələrinə uyğun olaraq, müəllimlərin vəzifə maaşlarına əlavələr ediləcək.

Proses iyunun 25-dək davam edəcək və ümumilikdə Naxçıvan Muxtar Respublikasının ümumtəhsil müəssisələrinin 350-yə qədər müəlliminin iştirakı gözlənilir.