İyunun 19-da Şəki-Zaqatala Regional Təhsil İdarəsinin tabeliyində fəaliyyət göstərən ümumtəhsil müəssisələrinin müəllimləri üçün növbəti sertifikasiya imtahanı keçirildi.  Şəki şəhər 20 nömrəli tam orta məktəbdə təşkil olunan imtahan prosesini izlədik. Bu gün 334 müəllim imtahan verdi. Ümumilikdə region üzrə 1175 müəllim bu prosesə cəlb olunub. Onlardan 306-sı təkrar sertifikasiyada iştirak edən müəllimlərdir.

Sertifikasiya prosesi Təhsil İnstitutu tərəfindən mərkəzləşdirilmiş qaydada təşkil olunub və şəffaflıq prinsipləri təmin edilib. İmtahandan sonra bir sıra yüksək bal toplayan müəllimlərlə həmsöhbət olduq. Onlar fikirlərini “Azərbaycan müəllimi” ilə bölüşdülər.

Qax rayon Şotavar kənd tam orta məktəbinin coğrafiya müəllimi, 8 illik təcrübəyə malik Sənan Yusifli imtahanda 56 bal toplayıb. O, nəticəsini belə dəyərləndirir: “Suallar aydın idi və rahatlıqla cavablandıra bildim. İmtahan prosesi çox şəffaf idi və heç bir narahatlıq olmadı. Məktəb metodikasını bilən hər kəs üçün bu imtahan rahat idi”.

Zaqatala rayon Humanitar fənlər gimnaziyasının coğrafiya müəllimi, 4 illik təcrübəyə malik Cavid Abdullayev bu mərhələdə 55 bal toplayaraq yüksək nəticə qazananlar sırasında yer alıb. “Sualların tərtibatı düzgün idi və prosesi şəffaf şəkildə keçirdik. Hər gün dərsdə tətbiq etdiyimiz metodların burada da bizə köməyi oldu”.

Şəki şəhəri Kiçik Dəhnə kənd 1 nömrəli tam orta məktəbin müəllimi İlqar Yusifzadə 57 bal toplayaraq, imtahanda təqdim olunan sualların məktəb tədris proqramı ilə uyğunluğundan razılığını ifadə etdi: “Suallar praktik və məzmunlu idi. İmtahan prosesi tam şəffaf təşkil olunmuşdu. Gündəlik dərsdə olan yanaşmalarla uyğunluq görmək sevindiricidir”

18 illik pedaqoji təcrübəsi olan Elşad Əliəkbərov Şəki şəhər 18 nömrəli  tam orta məktəbdə çalışır və bu imtahanda 58 bal toplamasının səbəbinə belə aydınlıq gətirdi: “Suallar həyat təcrübəmlə üst-üstə düşdü. İmtahanda hər şey nəzarət altında idi və rahat mühit yaradılmışdı. Təcrübə bu cür sınaqlarda özünü göstərir”

Balakən rayon Nəsimi adına 2 nömrəli tam orta məktəbin müəllimi Gülnarə Nooyeva bu imtahandan 55 bal yığdığını vurğuladı: “İmtahan tam şəffaf idi və sanki gündəlik dərs prosesi idi. Rahat şəkildə cavablandırdım”.

Sahilə Terçiyeva Balakən rayon Şambul kənd tam orta məktəbində coğrafiya fənnini tədris edir. 14 illik təcrübəyə malik müəllim bu mərhələdə 58 bal qazanaraq yüksək nəticə əldə edib. Sahilə Terçiyeva uğurunu belə şərh edir: “Son 20 gündə ciddi hazırlaşdım və bunun nəticəsini gördüm. Suallar real dərs mühitinə uyğun hazırlanmışdı”. 

Qax rayon Cəlayir kənd tam orta məktəbi  müəllimi, 17 illik pedaqoji təcrübəyə malik Nargilə Məmmədova isə 59 bal toplayaraq yüksək nəticə qazanmasının sevincini bizimlə bölüşdü: “Suallar aydın idi və imtahan prosesində heç bir narahatlıq yaşamadım. Hər şey şəffaf və rahat idi”.

Zaqatala rayonu Kəpənəkçi kənd tam orta məktəbin müəllimi Arzu Rzayeva bu imtahanda 58 bal qazanıb. O, sevincini bizimlə bölüşdü: “Suallar aktual mövzuları əhatə edirdi və imtahan tam şəffaf keçdi. Günlük dərs prosesində istifadə etdiyimiz bacarıqların burada dəyərləndirilməsi faydalı oldu.”

Könül Qarayeva Şəki rayon Heydər Əliyev adına Kiş kənd 1 nömrəli tam orta məktəbdə fəaliyyət göstərir. Onun bu mərhələdəki nəticəsi 59 bal olub: “İmtahan mühiti sakit idi və sulları diqqətlə cavablandırmaq üçün hər şərait yaradılmışdı. Gündəlik dərsə məsuliyyətlə yanaşan müəllim üçün bu proses çətin deyil”.

Şəki şəhəri 4 nömrəli tam orta məktəbin coğrafiya müəllimi 59 bal toplayan müəllimlər sırasındadır. Turanə Məmmədova qeyd etdi ki, test sualları aydın, dərsdə keçdikləri mövzulara uyğun idi: “İmtahan mühiti sakit idi, namizədlər üçün hər bir şərait yaradılmışdı. Düşünürəm ki, bu imtahanın sualları müəllimin gündəlik fəaliyyətinə uyğun hazırlanmışdı və çətinlik yaratmadı”.

Sertifikasiya imtahanları müəllimlərin bilik və bacarıqlarını, eyni zamanda pedaqoji fəaliyyətlərindəki praktiki hazırlıqlarını obyektiv şəkildə dəyərləndirmək məqsədi daşıyır. Təhsildə keyfiyyət, şübhəsiz, müəllimin keyfiyyəti ilə bağlıdır. Bu baxımdan belə sınaq və qiymətləndirmələr həm təhsil sisteminə dinamizm gətirir, həm də müəllimlərin özünüinkişafına ciddi stimul verir.