Məleykə Abbaszadə təhsil ekspertlərini imtahan nəticələrinin qiymətləndirilməsi prosesində iştiraka dəvət edib.

“Azərbaycan müəllimi” xəbər verir ki, bunu Dövlət İmtahan Mərkəzinin sədri Məleykə Abbaszadə ali təhsil müəssisələrinə qəbul imtahanlarının başlaması ilə əlaqədar mətbuat konfrasında jurnalistlərin suallarını cavablandırarkən deyib. 

O deyib ki, ekspertlər müəyyən təlim və kurslardan keçdikdən sonra bu prosesdə iştirak edə bilərlər: “Bu proses tam açıqdır. Elə yazı işləri var ki, orada işi oxumaq mümkün deyil. Amma biz şikayət əsasında o işi yenə də təkrar yoxlayırıq. Yazı işlərini yaxşı yazan uşaqların sayı elə də çox deyil. Əksər hallarda Apellyasiya Komissiyasına müraciət edən abituriyentlər öz yazı işlərinə açıb baxmadan bizə müraciət edirlər”. 

DİM sədri qeyd edib ki, əksər Avropa ölkələrində apellyasiya müraciəti etmək ödənişlidir.

O bildirib ki, imtahan nəticələrinin yoxlanılması prosesindən, nəticələrdən şikayət edən hər bir təhsil eksperti DİM-ə müraciət edib imtahan nəticələrinin qiymətləndirilmə prosesində iştirak edə bilər: “Biz onları mediatura dəvət etdik, cəmi iki təhsil eksperti gəldi. Təhsil ekspertlərinin başı feysbukda status yazmağa qarışıb".