Təhsildə keyfiyyətin artırılması və tələbələrin qeyd edilən prosesdə iştirakını təmin etmək məqsədilə Təhsildə Keyfiyyət Təminatı Agentliyi (TKTA) “Keyfiyyət elçisi” adlı yeni təlimə başlayıb.

“Azərbaycan müəllimi” xəbər verir ki, görüşü giriş nitqi ilə açan TKTA-nın İdarə Heyətinin sədri Tural Əhmədov tələbələri salamlayaraq, onları müsabiqə və müsahibə prosesindən uğurla keçmələri münasibəti ilə təbrik edib. O, keyfiyyətli tədris prosesinin təşkilində tələbələrin mühüm roluna toxunaraq bildirib ki, tələbələr təkcə bilik alan tərəf deyil, eyni zamanda təhsildə keyfiyyət tələblərinin  formalaşması, tədris prosesinin təkmilləşdirilməsi və institusional mühitin müasirləşdirilməsində  fəal iştirak edən əsas maraqlı tərəflərdən biridir. Onların keyfiyyət mədəniyyətinə verdikləri töhfə və tənqidi düşünmə bacarıqları təhsil müəssisələrinin davamlı inkişafına zəmin yaradır. İdarə Heyətinin sədri əlavə edib ki, bu kimi təşəbbüslər tələbələrin akademik biliklərini real təcrübə ilə əlaqələndirmələrinə, müasir təhsil standartlarını  dərindən dərk etmələrinə və keyfiyyətin təmin olunmasında fəal mövqe sərgiləməklərinə şərait yaradır.

Təlim çərçivəsində müxtəlif universitetlərdən seçilmiş tələbələr ali təhsil müəssisələrinin qiymətləndirilməsində tətbiq edilən institusional və proqram akkreditasiya meyarları ilə  yaxından tanış olublar.

“Keyfiyyət elçisi” təlim proqramına 19 ali təhsil müəssisəsindən ümumilikdə, 707 tələbə “Ali təhsil müəssisələrində keyfiyyət mədəniyyətinin formalaşmasında təhsilalanların rolu” mövzusunda esse yazaraq müsabiqəyə qatılıblar. Esse müsabiqəsinin qalibi olmuş 54 tələbə 11 fevral 2025-ci il tarixində onlayn formatda təşkil edilmiş təlimə qatılıb. 26-27 fevral 2025-ci il tarixlərində təşkil edilən təlimin ikinci modulunda isə tələbələr simulyasiya görüşündə iştirak ediblər. İştirakçılar şərti təhsil müəssisəsindəki təhsil mühitini təsvir edən hekayələr əsasında təhsil müəssisələrində mövcud vəziyyəti institusional akkreditasiya qiymətləndirmə meyarlarında əks olunan indikatorlar əsasında təhlil edərək, təqdim olunan suallara əsaslandırılmış cavablar verib və əldə etdikləri nəticələri təqdim ediblər. Təqdimat mərhələsində tələbələr şərti ali təhsil müəssisəsi üzrə verilmiş konkret nümunələr əsasında qiymətləndirmə apararaq təhsil müəssisələrində keyfiyyət siyasətinin optimal təşkili üçün perspektiv fəaliyyətin konturlarını müəyyənləşdirməyə çalışıblar.

TKTA bu  təşəbbüslə tələbələrin təhsil aldıqları universitetlərində “Keyfiyyət elçisi” qismində fəaliyyət göstərərək keyfiyyətli təhsil mühitinin təşkilinə və ali təhsil müəssisələrinin institusional və proqram akkreditasiya qiymətləndirilməsini aparacaq akkreditasiya komissiyalarının tərkibində bir üzv kimi çalışaraq töhfə vermələrini hədəfləyib.