"Azərbaycan müəllimi" RFO qaliblərinin uğur hekayələrini təqdim etməyə davam edir. Abşeron–Xızı Regional Təhsil İdarəsinin tabeliyində fəaliyyət göstərən ümumi təhsil müəssisələrinin şagirdləri ən yüksək nəticə göstərən məktəblilər sırasındadırlar. 

“Qızıl medal aldığımı dostumdan öyrəndim”

Onlardan biri – Xırdalan şəhəri Veysəl Müsibov adına 5 nömrəli tam orta məktəbin 10-cu sinif şagirdi Əli Sadıqlı riyaziyyat fənni üzrə RFO-da qızıl medala sahib olub. Uşaqlıqdan riyaziyyata maraq göstərən Əli müəllimi İlkin Əkbərovun tövsiyəsi ilə olimpiadalara qoşulub və getdikcə belə müsabiqələrə marağı artıb: “Dərslərimi həmişə yaxşı oxumuşam, həmişə əlaçı olmuşam, 9-cu sinfi qırmızı attestatla bitirmişəm. 2024-ci ildə keçirilən RFO-da riyaziyyat üzrə ikinci yerə çıxaraq gümüş medala layiq görülmüşəm. Həmçinin 9-cu sinifdə TR-YÖS 2024/2 imtahanından dünya yeddincisi olmuşam, Türkiyənin müxtəlif universitetlərindən Tibb fakültələri üzrə qəbul almışam. 23 aprel 2025-ci ildə keçirilən "Zəkaların mübarizəsi” olimpadasının komanda yarışında regional mərhələdə birinci yerə çıxaraq finala vəsiqə qazanmışam”. 

Məktəbli riyaziyyat müəllimi Xanım Teymurovaya, sinif rəhbəri Turan Seyidəliyevaya, oxuduğu məktəbin direktoru Vüsal Süleymanova və direktor müavini Minəxanım Səfərovaya, həmçinin onda olimpiadaya həvəs yaradan riyaziyyat müəllimi İlkin Əkbərova minnətdarlığını bildirərək onların və valideynlərinin arzusunu yerinə yetirmək üçün əlindən gələni etdiyini qeyd edir.

Olimpiada həyəcanı barədə söhbət açan qalib söyləyir: “Olimpiadada yüksək təşkilatçılıq var idi, nəzarətçilər yarana biləcək istənilən problemin qarşısını alırdı. Olimpiadada koordinasiya tam şəffaf keçirildi. Qızıl medal alacağıma inanırdım, amma rəsmi nəticələr açıqlanana qədər içimdə narahatlıq hissi var idi. Qızıl medal aldığımı dostumdan öyrəndim. İlk olaraq, o mənə zəng edib təbrik etdi. Valideynlərim bu uğurda mənə hərtərəfli dəstək olub, onların inamlarını doğrultduğum üçün çox xoşbəxtəm”. 

Qalib məktəbli hesab edir ki, uğur qazanmaq üçün əsas olan davamlılıq və iradədir: “Olimpiadada bir suala ortalama olaraq 1 saat vaxt verildiyini nəzərə alaraq, suala heç 5 dəqiqə baxmamış sualdan sıxılmaq, həmçinin sualın həllinə baxmaq və yaxud da başqa suala keçmək sizi heç bir yerə daşımayacaq”. 

Əlinin gələcək hədəfləri arasında beynəlxalq olimpiadalardan medal qazanmaq, xaricdə yüksək reytinqli universitetlərdən birində təhsil aldıqdan sonra Vətənə qayıdıb burada işləmək əsas yeri tutur.

“Ailəm, məktəbim, kəndim, rayonum mənimlə qürur duyur”

Xızı rayon Xələnc kənd orta məktəbin 9-cu sinif şagirdi Namiq Nəzərli RFO-da coğrafiya fənni üzrə bürünc medal qazanıb. Namiq bu fənnə marağının hələ ibtidai siniflərdə Həyat bilgisi fənnini keçərkən baş qaldırdığını deyir: “Həyat bilgisi dərsini bizə ixtisasca coğrafiya müəllimi olan Fəqət Bəşirov tədris edirdi. O, “Həyat bilgisi” dərsliyini, eləcə də coğrafiyanı bizə mükəmməl mənimsətmişdi. Hələ 3-cü sinifdə oxuyarkən dəfələrlə bilik yarışmalarında yuxarı sinif şagirdlərinə qalib gəlmişik. Coğrafiya fənnindən reytinqim həmişə yüksək olub. 2023-2024-cü tədris ilində 8-ci sinifdə oxuyarkən RFO-nun final mərhələsinə cəmi 0,25 balım çatmadı”. 

Namiqin sözlərinə görə, dərs əlaçısı olsa da, RFO-ya hazırlıq gündəlik dərs prosesindən tamamilə fərqlidir. Şagirdlərin oxuyub anlama, təhlil, tətbiqetmə və məntiqi bacarıqları güclü olmalıdır: “Qlobus, xəritə, atlaslar, ensiklopediyalar, statistika həmişə göz önündə olmalıdır. Çeviklik də əsas şərtlərdəndir. Mən vaxt bölgüsünə düzgün əməl etsəydim, nəticələrim daha yüksək olardı”. 

Məktəbli olimpiada qalibi olduğunu öyrəndiyi an sevincini ilk paylaşmaq istədiyi şəxs Fəqət müəllim olub, lakin həmin vaxt müəlliminin telefonuna zəng çatmayıb. Sonradan öyrənib ki, Fəqət müəllim onunla eyni vaxtda “Mülki müdafiə” kursunda imtahan verirmiş: “Hər ikimizin uğurları eyni anda bəlli oldu. Çox fərəhləndim. Ailəm, məktəbim, kəndim, rayonum, mənimlə qürur duyur. Sonra məlum oldu ki, rayonumuzun tarixində ilkə mən imza atmışam, rayonumuzda ilk olimpiada medalçısı olmuşam. Ailəm az imkanları ilə təhsilimə həmişə dəstək olub. İnamlarını doğrultduğum üçün qürurluyam”.

Uğurlu kənd məktəblisinin gələcək arzusu nüfuzlu ali məktəbə qəbul olmaq və elmi işlə məşğul olmaqdır. Rayonlarında onun kimi şagirdlərin sayının çoxalması üçün Namiq həmyaşlarına, məktəblilərə səylə oxumağı, mövcud dərsliklərlə kifayətlənməməyi, müasir texnologiyaların imkanlarından düzgün istifadə etməyi tövsiyə edir.