“Texnologiyanın köləsi deyil, onu idarə edən zehnin ağası olun” – Selçuk Bayraktar
Türkiyə ali təhsil müəssisələrinə qəbul imtahanlarında maksimum - 500 bal toplayaraq tələbə adını qazanan gənclərlə görüşdə “Baykar” Texnologiya şirkətinin İdarə Heyətinin sədri Selçuk Bayraktar onları uğura aparacaq 11 qızıl məsləhətini paylaşıb.
“Azərbaycan müəllimi” xəbər verir ki, çıxışında S.Bayraktar Türkiyənin texnologiya məqsədlərinə diqqət çəkib və “KIZILELMA”nın (Türkiyənin ilk pilotsuz qırıcısı) vizyonunu izah edib.
Gəncləri nailiyyətləri münasibətilə təbrik edən Səlçuk Bayraktar onların həyatlarının ən yorucu və stressli dövrlərindən birini uğurla başa vurduqlarını bildirib.
Bu uğurun arxasındakı sərf olunan səyləri, yuxusuz gecələri və imtahana hazırlıq dövrünün qoyduğu izləri aydın şəkildə xatırladığını deyən S.Bayraktar bildirib: "Siz asan yolu yox, çətin, ən az ayaq izi olan yolu seçdiniz. Hər biriniz zehninizdə və ruhunuzda sabahın ulu çinarlarına çevriləcək toxumları daşıyırsınız. Sizi bu salona gətirən də bütün bu fərqi yaradan seçimdir. Həyat sizə daha çox yol ayrıcları təqdim edəcək. Bu fani dünyada iz buraxmaq və fərq yaratmaq istəyəndə yenidən az səyahət edilən, məsuliyyətli və keçilməyən yolları seçməli olacaqsınız. 25 il əvvəlki Selçuğa, sizin yaşınızda olduğum dövrə baxanda və "Bu həyatdan nə öyrəndiniz, gənc Selcuğa nə deyərdiniz?" deyə düşünəndə, təcrübələrimdən qaynaqlanan 11 dərsi sizinlə bölüşmək istəyirəm".
Həyat yalnız çoxseçimli imtahanda düzgün seçim etmək deyil
Həyatın sadəcə çoxvariantlı imtahanda düzgün cavabı qiymətləndirməkdən ibarət olmadığını vurğulayan S.Bayraktar deyib: "Siz YKS-də (Universitet Qəbul İmtahanı) çox dəyərli olan əhəmiyyətli fərdi uğurlar qazanmısınız. Lakin həyatda bütün böyük və davamlı nailiyyətlər komanda işi ilə əldə edilir. Dostluqlarınız, xarakteriniz, sədaqətiniz, komanda olmağınız... Bunlar təhsil sisteminin öyrətmədiyi, ölçmədiyi və ya qiymətləndirmədiyi daha vacib aspektlərdir. Ən vacib məqsədlərinizə bu dəyərlərə bağlı olan yoldaşlarınızla çatacağınızı görəcəksiniz".
"Cəsarətli olun və vicdanınızın səsinə qulaq asın"
Əsrlər əvvəl İmam Hüseynin söylədiyi "Həyat inanmaq və mübarizə aparmaqdan ibarətdir" sözlərini sitat gətirən S.Bayraktar, inanc olmadan mübarizə aparmağın heç bir dəyəri olmadığını və bu inancın özünün mübarizə aparılmadığı təqdirdə ya güclənməyəcəyini, ya da tədricən yox olacağını bildirib: "İmanınızı hərəkətləriniz və mübarizələrinizlə yaşadın. Cəsarətli olun və vicdanınızın səsinə qulaq asın".
İnsanın çəkisi onun mənəvi seçimləri ilə müəyyən olunur...
Selçuk Bayraktar bildirib ki, insanın çəkisi onun mənəvi seçimləri ilə müəyyən ediləcək. O, gənclərin bu vacib imtahana addım-addım, səbirlə hazırlaşdıqlarını və uğur qazandıqlarını bildirərək qeyd edib:
"Siz, həqiqətən də, çox böyük səy göstərmisiniz. Lakin həyat sınağındakı yeriniz yalnız akademik suallara verdiyiniz cavablarla deyil, həm də mənəvi seçimlərinizlə müəyyən ediləcək. Bu seçimlər sizi müxtəlif çətinliklər və qorxularla qarşı-qarşıya qoyacaq və bunların öhdəsindən gəlməli olacaqsınız. Viktor Hüqonun "Səfillər" əsərindəki məhkəmədə vicdanının səsini eşidən və hər şeyi itirmək bahasına həqiqəti qışqıran Jan Valjan kimi. Yaxşı insan olmağın, bütün yaradılmışların ən şərəflisi olmağın mahiyyəti məhz bu sınaqlar tərəfindən formalaşdırılacaq. Bütün bu sınaqlardan uğurla keçdiyiniz zaman insanlıq abidəsi ortaya çıxacaq. Zaman həm dözümlülüyünüzü, həm də cəsarətinizi mütləq ölçəcək”.
Həyatda rahatlıq yoxdur, təsəlli axtarmayın
"Həyatda rahatlıq yoxdur; onun ardınca qaçmayın. Əgər "Bu imtahan bitdi, indi rahatlana bilərəm" deyə düşünürsünüzsə, yanılırsınız. Həyatda daimi rahatlıq vəziyyəti yoxdur! Qətiyyən yoxdur", - deyə Selçuk Bayraktar vurğulayıb.
O, müvəqqəti rahatlığın belə uzun sürməyəcəyini qeyd edərək, aşağıdakı müşahidələrini çatdırıb: "Təsəvvür edin ki, ən geniş çimərliklərdə sonsuz bir tətilə can atırsınız. Bir müddət sonra bu, sizin standartınıza çevriləcək. Milçəklər sancacaq, qum batmağa başlayacaq, dalğalar sizi narahat edəcək, günəş dərinizi yandıracaq, dəriniz soyulacaq. Bir sözlə, rahatlığınız yenidən pozulacaq. Buna görə də həyatda rahatlıq axtarmayın, çünki davamlı rahatlıq deyə bir şey yoxdur. Rahatlıq tapdığınız zaman minnətdar olun; bu uzun sürməyəcək, qaçılmaz olaraq narahatlıqlar yaranacaq. Həyatda rahatlıq yoxdur. Əhəmiyyətli olan rahatsızlığınızı nəyə çevirdiyinizdir.
Ölkəmizin ilk pilotsuz döyüş təyyarəsi olan “KIZILELMA” kimi bir əsər də rahatlıq zonalarından kənara çıxaraq inşa edilmişdir. Çünki bəşəriyyət tarixindəki bütün böyük və vacib işlər rahatlıq zonalarından kənara çıxmağa hazır olanlar tərəfindən həyata keçirilmişdir. Rahatlığınızı faydalı işə, istehsala və davamlı işlərə çevirin".
"Texnologiyanın köləsi olmayın, onu idarə edən zehnin ağası olun"
Gənclərə "maşınların və maşın-insanların köləsi olmamağı" tövsiyə edən S.Bayraktar,süni intellektin sürətlə inkişaf edən bir dövründə yaşadığımızı söyləyib:
"Süni intellekti ən dəyərli qabiliyyətlərinizi, idrak qabiliyyətlərinizi inkişaf etdirmək üçün bir vasitə kimi görməlisiniz. Çünki texnologiya və süni intellekt inkişaf etdikcə, yalnız maşınlardan və maşın-insanlardan daha yaxşı işlər gördüyünüz zaman əsl dəyərinizi və ləyaqətinizi qoruya biləcəksiniz. Texnologiyanın köləsi olmayın, onu idarə edən zehnin ağası olun".
Bu günün yox, sabahın yarışlarına hazırlaşın
S.Bayraktar gənclərin yalnız bu gün deyil, sabahkı yarışlara hazırlaşmasının vacibliyini vurğulayıb. “Bugünkü deyil, sabahkı yarışlara hazırlaşın. Bugünkü arenalarda yarışmaq sizi qabağa çıxarmayacaq. Bu günün populyar mövzularına diqqət yetirməyin; 5 və ya 10 il sonrakı texnologiyalara, sabahkı yarışlara indidən hazırlaşmağa başlayın. “Baykar”da ilk addımlarımızı atdığımız zaman həmin günün yarışlarını hədəf qoymamışdıq. Gələcəyin texnologiyasına fokuslandıq və buna görə də bu gün fərq yarada bildik”.
Həyatda prioritetlərinizi düzgün təyin edin...
Həyatda prioritetlərin düzgün müəyyənləşdirilməsinin vacibliyini vurğulayaran S. Bayraktar deyib: “İnsanın prioritetlərini vaxtaşırı xatırlatması, bu həyatda itirə biləcəyi şeyləri dəyər sırası ilə sadalaması çox faydalıdır. Ağlımda topladığım prioritetlərimin siyahısı budur: Əvvəlcə: inanc, sonra məhəbbət və sevgi, ailə, dostlar. Sağlamlıq, vaxt, sülh, mənəvi məmnuniyyət, özünəinam, ümid və yenə də əvvələ qayıdaq: inanc. Bunlardan sonra ləyaqət və xoşbəxtlik kimi mənəvi dəyərlər gəlir.
Nəhayət, maddi dəyərlər ən aşağıdadır. Siz də prioritetlərinizi müəyyən etməlisiniz. Əgər prioritetləriniz doğrudursa, həyatda yolunu heç vaxt itirməyəcəksən”.
Kökünüzü, haradan gəldiyinizi və hansı torpağın duası ilə böyüdüyünüzü unutmayın
“Bunu heç vaxt unutmayın: Göylərə nə qədər yüksələcəyiniz, yer üzündə nə qədər dərin kök saldığınızla müəyyən edilir. Heç vaxt kökünüzü, haradan gəldiyinizi və böyüdüyün torpağın duasını unutmayın. Göylərə doğru uzanan çinar ağacları qablarda bitmir... Kökləri dar qablarda olan bir fidan, nə qədər böyüməyə meyilli olsa da, ilk sərt fırtınada quruyacaq. Bizi bu torpaqlarda biz edən və ayaqda saxlayan şey mədəniyyətimizin qədim dəyərləridir”.
"Necə" etməyiniz "nə" etdiyinizdən daha vacibdir
“Daha əhəmiyyətlisi isə bunu "niyə" etməyinizdir. Ürəyinizdə yatan aslanın, sevdanızın, ehtirasınızın ardınca gedin. Ancaq nə etdiyiniz, hansı peşəni seçdiyiniz, inanın, o qədər də vacib deyil. Bu işi hansı prinsiplərlə və əxlaqi prinsiplərlə yerinə yetirməyiniz daha vacibdir. Və daha da əhəmiyyətlisi isə bu işi hansı niyyətlərlə və "niyə" yerinə yetirməyinizdir.
İnsan təbiətcə özünü birinci yerə qoyan bir varlıqdır. Özünüzdən daha çox ailənizi, ailənizdən çox cəmiyyətinizi, cəmiyyətinizdən çox toplumunuzu, toplumunuzdan çox millətinizi, millətinizin deyil, bəşəriyyətin yaxşılığını birinci yerə qoyun”.
Müstəsna nəticələr əldə etmək üçün müstəsna şəraitdə işləməlisiniz
“Hamı kimi olmaq, hər şeyi orta və normal səviyyədə etmək və müstəsna nəticə əldə etmək mümkün deyil… Siz bunu ən azı bir dəfə bacardınız. Qarşınızda uzun bir həyat yolu var və bu nəticələrin qalıcı olması üçün bu müstəsna performansı təkrar-təkrar nümayiş etdirməlisiniz. İmkanlarınızın hüdudlarında işləməyə, fədakarlıq göstərməyə, yuxusuzluqla razılaşmağa hazır olmalısınız.
Hədəflərinizi ola biləcəyi ən yüksək yerə qoyun
Heç bir küləyin səmti və məsafəsi olmayan bir gəmiyə fayda gətirməyəcəyini deyən S.Bayraktar bildirib: “Həyatda bir məqsədiniz, “KIZILELMA”nız olması vacibdir. “Baykar”ın təxminən 25 illik səyahətində, kiçik bir komanda ilə başladığımız ilk gündən etibarən bir məqsədimiz var idi: ölkəmizin səmada tam müstəqilliyini təmin etmək üçün Türkiyənin ilk pilotsuz döyüş təyyarəsini istehsal etmək. KIZILELMA, qətiyyət, səy, fədakarlıq və bütün çətinliklərə qarşı sarsılmaz mübarizə ilə gerçəkləşən bir xəyalın məhsuludur.
Bizlər 1, 2, 5 və 10 illik strateji yol xəritələrimizi bütün qurumlarımızdakı dostlarımızla birlikdə addım-addım izləməyi hədəfləyirik. Sizə məsləhətim: “KIZILELMA”nızı, hədəfləriniz və xəyallarınızın ola biləcəyi ən yüksək yerə qoyun”.
