Dilqəm Tağıyev: Elmi populyarlaşdıran verilişlər çox azdır
“Təəssüf ki, televiziyalarda elmin populyarlaşdırılmasına xidmət edən verilişlər çox azdır”.
“Azərbaycan müəllimi” xəbər verir ki, bunu Kataliz və Qeyri-üzvi Kimya İnstitutunun baş direktoru akademik Dilqəm Tağıyev deyib.
Onun sözlərinə görə, elmin populyarlaşdırılmasında əsas məqsəd getdikcə çətinləşən elmi nəticələrin, elmi fenomenlərin sadə və anlaşılan tərzdə ictimaiyyətə çatdırmaqla cəmiyyətdə, o cümlədən gənc nəsildə elmə marağın artırılmasıdır:
“Elmin populyarlaşdırılmasında bir çox vasitələrdən istifadə olunur. Bu vasitələrdən ən səmərəli olan elmi-populyar ədəbiyyat təkcə elmi populyarlaşdırmaqla kifayətlənmir, həm də oxucunu problem haqqında düşünməyə vadar edir. Bir çox alimlər elmə gedən yollarına gənclik illərində başlayıblar. Elmi-populyar kitablar, elmi jurnallar və verilişlər insanda böyük maraq yaradır, onda dərin iz buraxır və bu, bir çoxları üçün həyatın mənasına çevrilir. Populyarlaşdırma vasitələrindən ən təsirlisi mediadır ki, milyonlarla oxucu, dinləyici və tamaşaçı sayəsində elm kütlələrə çatır, populyarlaşır”.
