Naxçıvan Müəllimlər İnstitutunda COP29 və “Yaşıl dünya naminə həmrəylik ili”nə həsr edilmiş elmi-praktik panel müzakirə keçirilib. İnstitutun Tələbə Həmkarlar İttifaqı Komitəsi və Tələbə Gənclər Təşkilatının birgə təşkilatçılığı ilə keçirilən tədbirdən əvvəl Təsviri incəsənət fakültəsinin tələbələrinin əl işlərindən ibarət sərgiyə baxış olub.

"Azərbaycan müəllimi" xəbər verir ki, institutun rektoru Azad Novruzov çıxışında bildirib ki, COP29-un Azərbaycanda keçirilməsi ölkəmizə siyasət, iqtisadiyyat, turizm, investisiya və regional liderlik də daxil olmaqla, bir çox sahələr üzrə töhfə verəcəyi gözlənilir. Ölkə prezidenti İlham Əliyevin Azərbaycanda bərpa olunan enerji və yaşıl transformasiya sahəsində effektiv siyasət yürütməsi, möhtəşəm beynəlxalq tədbirin Azərbaycanda keçirilməsi, Azərbaycanın yaşıl transformasiya istiqamətində əldə etdiyi nəticələr liderliyə gedən yolda atılmıs ən əhəmiyyətli addım olacaq və Azərbaycanın bir çox ölkələr və beynəlxalq təşkilatlarla siyasi əlaqələrinə daha da yüksək səviyyədə müsbət təsir göstərəcək.

Daha sonra Təbiət və incəsənət fakültəsinin tələbələrinin müzakirəyə həsr olunan videoçarxına baxış olub.

Konfransın gedişində paneldə Naxçıvan Müəllimlər İnstitunun Ümumi fənlər kafedrasının  müəllimi Gülnarə Səfərova “İqlim dəyişiklikləri: mahiyyəti, səbəbləri və fəsadları”, Naxçıvan Muxtar Respublikasının Ekologiya və Təbii Sərvətlər Nazirliyinin İctimaiyyətlə əlaqələr üzrə aparıcı məsləhətçisi Saleh Həsənov “İqlim dəyişiklikləri ilə mübarizədə və yaşıl enerjiyə keçiddə Naxçıvan modeli”, Naxçıvan Muxtar Respublikasının Səhiyyə Nazirliyi İctimai Səhiyyə Xidmətinin həkim laborantı Leyla Vəliyeva “İqlim dəyişikliyinin insan orqanizminə təsiri”, Naxçıvan Qida Təhlükəsizliyi İnstitutunun Elmi araşdırmalar sektorunun sektor müdiri Aynurə Qulamova  “İqlim dəyişikliyinin qida təhlükəsizliyi baxımından dəyərləndirilməsi”, Naxçıvan Muxtar Respublikası Həmkarlar İttifaqları Şurasının şöbə müdiri Eyvaz Əsgərov “COP29 və həmkarlar ittifaqlarinin bu istiqamətdə gördüyü işlər və fəaliyyətləri”, Naxçıvan Müəllimlər İnstitunun Pedaqogika və psixologiya kafedrasının müəllimi Sahilə Nəcəfova “İqlim dəyişimlərinin insan psixologiyasına təsiri” mövzusunda çıxış edib.

Tədbirdə tələbələrin verdikləri müxtəlif suallar cavablandırılıb, sonda isə institutun rektoru Azad Novruzov panelistlərə təşəkkürnamə təqdim  edib.