Müasir alim mütəmadi olaraq çalışan, çalışdığı sahənin inkişaf etmǝdiyini vǝ hǝr 5-10 ildǝn bir qırılma nöqtələrinin olduğunu hiss edǝn, fənlərarası çalışmaları düzgün dǝyǝrlǝndirǝn, yeni alimlǝr nǝslinin daha geniş bilgi bazası ilə ona yaxınlaşdığının fǝrqinǝ varan, yeni ideyaları zamanında və yerindǝ istifadǝ etmǝyi bacaran araşdırmaçıdır.

Bunu "Azərbaycan müəllimi"nə müsahibəsində Türkiyədə çalışan azərbaycanı alim Abdulla Sofiyev deyib.

O bildirib ki, müasir alim eyni zamanda tədris sahəsində də püxtələşmiş bir pedaqoq olmalıdır və pedaqoji fǝaliyyǝtdǝn uzaq olması düşünülmǝzdir:

"Müasir alim öz tǝlǝbǝlǝrinin yer aldığı elmi mərkəz (və ya komanda) yaratmalıdır vǝ onun lokomotivi olmalıdır. Bu elmi mərkəzdəki gənc tǝdqiqatçıların elmi sǝviyyǝlǝri fǝrqli olmalıdır. Mǝsǝlǝn, bir magistratura tələbəsi 2-3 il, bir doktorantura tələbəsi təxminən 4-5 il təhsil aldığı üçün “komandanın” içində təqribən 7 ili ǝhatǝ edǝn magistr-doktorant-tədqiqatçı profilləri olmalıdır. Komandaya yeni daxil edilən gələcəyin tədqiqatçısı bir il ondan əvvəl təhsilə başlayan tələbədən faydalana bilməlidir. Bu şəkildə magistr-aspirantların elmi səviyyələri sıfırdan birə qədər dərəcələndirilməlidir.

Nüfuzlu alim təbii seleksiyaçı olmalı və ilk seleksiyonunu universitetdə öz tələbələrinin arasından seçməlidir. Əgər tələbələr arasında qeyri-adi istedadlı tələbə varsa, onun iş rejimi fərqli tutulmalı və onunla fərqli davranılmalıdır. Daha sonra fərqli universitet və ölkələrdən istedadlı tələbələrlə birgə çalışmaq olar.

Bir sözlə, elmi fəaliyyət alimin pedaqoji fəaliyyətini zənginləşdirən tükənməz mənbə, pedaqoji fəaliyyət isə alimi püxtələşdirən əvəzolunmaz mühitdir".