Avqustun 7-də Azərbaycan Dövlət Pedaqoji Universitetində (ADPU) magistratura səviyyəsi üzrə yeni təhsil proqramlarının yaradılması ilə bağlı onlayn iclas keçirilib.

ADPU-dan “Azərbaycan müəllimi”nə bildirilib ki, iclasda çıxış edən universitetin rektoru professor Cəfər Cəfərov Təhsil ixtisasları işçi qrupunun magistratura təhsil səviyyəsi üzrə yeni təhsil proqramlarının hazırlanması prosesini uğrla tamamlayaraq Elm və Təhsil Nazirliyinə təqdim etdiyini, yaxın zamanda yekun sənədin təsdiq olunacağının gozlənildiyini diqqətə çatdırıb. Rektor prosesdə böyük rol oynayan ADPU-nun akademik heyət üzvlərinə təşəkkürünü bildirib.

Çıxış edən ADPU-nun tədris işləri üzrə prorektoru dosent Eldar Aslanov qeyd edib ki, universitet kollektivinin böyük töhfəsi ilə magistratura səviyyəsində Pedaqogika ixtisaslaşması üzrə 34 ixtisaslaşmanın, həmçinin digər ixtisas qruplarında olan və ADPU-nun kadr hazırlığı həyata keçirdiyi 9 ixtisaslaşmanın yenilənmiş təhsil proqramları Elm və Təhsil Nazirliyinə təqdim edilib. İclasın məqsədi isə 2025/2026-ci tədris ilindən etibarən magistratura səviyyəsinin birinci tədris ilində tədrisin yaxın zamanda təsdiqlənəcəyi gözlənilən yeni təhsil proqramları əsasında aparılacağını nəzərə alaraq, ixtisaslaşmalar üzrə təhsil proqramını və tədris planını hazırlamaqla bağlı məsələlərin müzakirəsidir.

Daha sonra iclas ixtisaslaşmalar üzrə yenilənmiş təhsil proqramları əsasında ixtisaslaşmalar üzrə aidiyyəti strukturlarda müvafiq tədris planlarının hazırlanması, bu zaman diqqət edilməli məqamların müzakirəsi ilə davam etdirilib.