Azərbaycan Memarlıq və İnşaat Universiteti (AzMİU) Tələbə Elmi Cəmiyyətinin (TEC) üzvlərindən ibarət  “INTEGRA” komandası İstanbul Texniki Universitetində keçirilən “Design Together with BIM” adlı beynəlxalq müsabiqədə 5-ci yerə layiq görülərək beynəlxalq səviyyədə böyük nailiyyət əldə edib.

“Azərbaycan müəllimi” xəbər verir ki, komandanın üzvləri – Su təsərrüfatı və mühəndis kommunikasiya sistemləri fakültəsinin kommunikasiya sistemləri mühəndisliyi ixtisası tələbəsi Məleykə Əliyeva, Memarlıq fakültəsinin memarlıq ixtisası tələbəsi Raya Rüstəmli və İnşaat fakültəsinin inşaat mühəndisliyi ixtisası tələbəsi Hüseyn Zəkirov layihə dizaynı, Building Information Modeling (BIM) texnologiyalarından səmərəli istifadə və enerji səmərəliliyi sahəsində nümayiş etdirdiyi peşəkar yanaşma ilə müsabiqədə fərqlənməyi bacarıblar. Qeyd olunan nailiyyət AzMİU tələbələrinin beynəlxalq rəqabətə hazırlığını və innovativ mühəndislik bacarıqlarını bir daha təsdiqləyib.

Bildirək ki, beynəlxalq müsabiqəyə AzMİU-nun İnşaat, Memarlıq, Su təsərrüfatı və mühəndis kommunikasiya sistemləri fakültələri, eləcə də “SABAH” qruplarından olan 2 tələbə də daxil olmaqla, ümumilikdə 16 tələbə qatılıb. Komandaların iştirakı və yarışa hazırlığı TEC-in təşkilatçılığı ilə həyata keçirilib. Tələbələrə universitetin Materialşünaslıq kafedrasının müdiri professor İradə Şirinzadə və TEC-in sədri Günel İmamquliyeva rəhbərlik ediblər.

Yarış iki əsas mərhələdən ibarət olub. Birinci mərhələ 2024-cü ilin 14–17 dekabr tarixlərində İstanbulda baş tutub və bu müddətdə iştirakçılar “Revit”, “Dynamo”, “Navisworks” və digər qabaqcıl proqram təminatları üzrə təlimlərdə iştirak ediblər. Eyni zamanda, tələbələr BIM sistemi üzrə nəzəri biliklərlə yanaşı texniki səfərlərdə iştirak edərək praktiki təcrübələr qazanıblar.

Təlimlərdən sonra başlayan 10 həftəlik layihə mərhələsində iştirakçılar BIM əsaslı dizayn, davamlı mühəndislik həlləri və müxtəlif sahələr üzrə əməkdaşlıq bacarıqlarını nümayiş etdiriblər. Müsabiqəyə Rusiya, Türkiyə, Azərbaycan, Albaniyadan ümumilikdə 23 komanda qatılıb və yekun layihələr 2025-ci ilin 15 mart tarixində münsiflər heyətinə təqdim olunub. Nəticədə AzMİU-nun “INTEGRA” komandası təqdim etdiyi uğurlu layihəyə əsasən, ilk 5-likdə qərarlaşıb.