Qarabağ Universitetinin Pedaqoji fakültəsinin dekanı Kəklik Gözəlova: “Qarabağ Universitetində müəllim hazırlığını sadəcə fənn öyrətmək kimi görmürük”

– Pedaqoji fakültədə hansı ixtisaslar üzrə təhsil almaq mümkündür?

– Pedaqoji fakültəmizdə gələcəyin müəllimlərini hazırlamaq üçün 8 bakalavr proqramı təklif olunur: Riyaziyyat müəllimliyi, Azərbaycan dili və ədəbiyyatı müəllimliyi, İbtidai sinif müəllimliyi, İngilis dili müəllimliyi, Coğrafiya müəllimliyi, Tarix müəllimliyi, Biologiya müəllimliyi və Kimya müəllimliyi. Hər bir ixtisas proqramı həm elmi bilikləri, həm də pedaqoji bacarıqları özündə birləşdirərək tələbələri müasir məktəb mühitinə hazırlayır. Beynəlxalq təcrübələrə əsaslanan kurikulum tələbələrin yalnız müəllim deyil, həm də təhsil lideri kimi formalaşmasına xidmət edir.

– Pedaqoji təhsilə yanaşmanız nə ilə fərqlənir?

– Qarabağ Universitetində biz müəllim hazırlığını sadəcə fənn öyrətmək kimi görmürük. Burada əsas məqsəd düşünən, dəyər verən, dəyişən və dəyişdirən müəllimlər yetişdirməkdir. Tədris modelimiz tələbəyə yalnız bilik verməkdən ibarət deyil - o, tələbənin tənqidi düşünmə, empatiya qurma, yaradıcı həll yolları tapma və komanda ilə işləmə bacarıqlarını inkişaf etdirməyə yönəlib. Bizim üçün müəllimlik sadəcə peşə deyil, bu, bir missiyadır. Və bu missiya Qarabağ Universitetində mümkündür.

– Tədris məzmunu və tələbələrə qazandırılan bacarıqlar barədə nə deyə bilərsiniz?

– Tədris planlarımız müasir akademik biliklərlə yanaşı, innovativ pedaqoji yanaşmaları da əhatə edir. Tələbələr rəqəmsal pedaqogika, dizayn təfəkkürü, layihə əsaslı öyrənmə, sinif idarəetməsi, inklüziv təhsil, sosial və emosional öyrənmə (SEL) kimi istiqamətlərdə də bacarıqlar qazanırlar. Biz tələbələrə elə ilk kursdan gələcəyin müəllimləri kimi baxır, onların məktəb mühitinə tez uyğunlaşması üçün mentorluq, müşahidə dərsləri və məktəb təcrübələrini erkən mərhələdən tətbiq edirik.

– Pedaqoji fakültənin akademik heyəti və tələbə həyatı barədə nə demək istərdiniz?

– Fakültəmizdə təcrübəli professor-müəllim heyəti ilə yanaşı, gənc və enerjili tədqiqatçı və pedaqoqlar da fəaliyyət göstərir. Onlar tələbələrə təkcə dərsdə deyil, dərsdən kənarda da dəstək olur, tələbələrin inkişafına istiqamət verirlər. Tələbə həyatı isə burada olduqca zəngindir. Tədrislə yanaşı, klublar, fakültativlər, pedaqoji layihələr, təlimlər, könüllülük fəaliyyətləri və məktəblərlə əməkdaşlıq proqramları sayəsində tələbələr həm öyrənir, həm də öyrədirlər.