“Şuşa şəhərində keçirilən Beynəlxalq Uşaq Yaradıcılıq Festivalı türk dövlətləri arasında mədəni, təhsil və humanitar sahələrdə əməkdaşlığın genişlənməsinə xidmət edir. Artıq ikinci dəfə baş tutan bu festival müxtəlif türk dövlətlərinin məktəblilərinin iştirakı ilə keçirilir və ortaq mədəni dəyərlərin, tarixin və incəsənətin təbliğinə, eləcə də dostluq əlaqələrinin möhkəmlənməsinə töhfə verir”. 

Bu fikirləri elm və təhsil nazirinin müavini Firudin Qurbanov "Azərbaycan müəllimi"nə açıqlamasında səsləndirib.

O qeyd edib ki, festivalın əsas məqsədi türk xalqları arasında mədəni və insani bağların gücləndirilməsidir:

“Festival çərçivəsində iştirakçılar hər bir ölkənin mədəniyyətini, incəsənətini, tarixini nümayiş etdirirlər. Bu isə gələcəkdə onlar arasında dostluq münasibətlərinin daha da möhkəmlənməsinə zəmin yaradır. Eyni zamanda, uşaqlar bir-birinin mədəniyyətini, adət-ənənələrini daha yaxından tanıyır, qarşılıqlı hörmət ruhunda formalaşırlar. Festivalın Şuşada keçirilməsi isə xüsusi əhəmiyyət daşıyır. Çünki iştirakçılar Şuşanın füsunkar təbiəti, zəngin tarixi və mədəni irsi ilə də tanış olurlar”. 

Nazir müavini əlavə edib ki, festival çərçivəsində məktəblilər incəsənətin müxtəlif sahələri üzrə yaradıcılıqlarını nümayiş etdirir, öz bacarıqlarını sərgiləyirlər. Bu, onların gələcək fəaliyyətlərinə stimul verir, özlərini ifadə etmə, ictimaiyyət qarşısında çıxış etmə və yaradıcı düşüncə bacarıqlarını inkişaf etdirir.

Onun sözlərinə görə, türk dövlətləri arasında əlaqələrin dərinləşməsi Qarabağda həyata keçirilən layihələrdə də öz əksini tapır:

“Özbəkistanın Şuşada məktəb binası inşa etməsi, Qazaxıstanın isə Mədəniyyət Mərkəzi hədiyyə etməsi bu həmrəyliyin bariz nümunəsidir. Qeyd edilməlidir ki, bu festival həm də uşaqların və gənc nəslin azad edilmiş ərazilərə mənəvi bağlarını gücləndirmək məqsədi daşıyır”.

O sonda qeyd edib ki, belə tədbirlər türk dövlətləri arasında əməkdaşlığın yeni müstəviyə qədəm qoyduğunu göstərir və gələcəkdə bu münasibətlərin daha da genişlənəcəyi gözlənilir.