“Bu dövrdə təhsil artıq sadəcə öyrətmək vasitəsi deyil, həm də cəmiyyətlərimizi və sistemlərimizi dəyişdirmək üçün əsas gücə çevrilməlidir. Bu, inklüziv və davamlı inkişaf məqsədlərinə, xüsusilə də BMT-nin Dayanıqlı İnkişaf Məqsədi 4-ə (SDG 4: Keyfiyyətli Təhsil) çatmaq üçün çox vacibdir”.

“Azərbaycan müəllimi” xəbər verir ki, bu fikirləri ICESCO-nun Təhsil sektorunun rəhbəri Haddy Jatou Sey Elm və Təhsil Nazirliyi və İslam Dünyası Təhsil, Elm və Mədəniyyət Təşkilatının (ICESCO) birgə təşkilatçılığı ilə keçirilən “Yaşıl təhsil” mövzusunda ilk regional konfransında deyib.

O bildirib ki, iqlim dəyişikliyi probleminin nəticələri hər gün özünü göstərir: “İqlim dəyişikliyi su ehtiyatlarımıza, qida sistemlərimizə və cəmiyyətimizin əsas dayaqlarına ciddi təsir göstərir.

Mərkəzi Asiyada isə bu təsirlər daha aydın görünür, buzlaqlar əriyir, su azalır, təbiətdəki canlı müxtəliflik yox olur. Bu yanaşmadan çıxış edərək ICESCO Kembric Universiteti ilə əməkdaşlıq çərçivəsində “Yaşıl təhsil siyasəti” sənədini hazırlayıb. Çünki ICESCO-nun əsas strategiyalarından biri üzv dövlətlərə iqlim dəyişikliyi ilə mübarizədə dəstək olmaq və bu sahədə yol göstərməkdir.

ICESCO-nun elmi bölməsi indi Elm və Ətraf Mühit Departamenti adlanır və bu qurum üzv dövlətlərə iqlimə uyğunlaşma, zərəri azaltma və davamlılıq sahələrində güclü dəstək göstərir”. 

O bildirib ki, ICESCO-nun təhsil sahəsindəki bölmələri üzv dövlətlərin iqlim fəaliyyətini təhsil proqramlarına daxil etməsi üçün böyük səylə çalışır:

“Bu məqsədlə hazırlanan “Yaşıl təhsil çərçivəsi” ötən il Omanda keçirilən nazirlər konfransında üzv dövlətlərin nazirləri tərəfindən rəsmi olaraq təsdiqləndi. Ötən il Bakıda keçirilən COP29 konfransında iştirak edərək, biz həmin siyasət çərçivəsini rəsmi şəkildə təqdim etdik və istifadəyə verdik.

Bizim bu çərçivə ətrafında cəmi dörd əsas istiqamətimiz var. Bu mövzular üzərində düşünürük:

- Üzv dövlətlərə öz tədris proqramlarını (kurikulumlarını) bu istiqamətə uyğunlaşdırmaqda necə kömək edə bilərik?
- Müəllimlərin ixtisasını artırmasını və təlimlərini necə təmin edə bilərik?
- Məktəbləri bu prosesə necə cəlb edə bilərik?
- Cəmiyyətlərin iştirakını və gənclərin iqlim fəaliyyətində lider olmasını necə təşviq edə bilərik?

Bu dörd istiqamət, məncə, təhsil sisteminin bütün pillələrində ekoloji məsuliyyətin dərindən yerləşməsinə xidmət edəcək. Beləliklə, təhsil iqlimə qarşı dayanıqlığın və həssaslığa qarşı dözümlülüyün əsas hərəkətverici qüvvəsinə çevriləcək.

Ümid edirik ki, bu konfrans nəticəsində üzv dövlətlər arasında qarşılıqlı öyrənmə, təcrübə mübadiləsi və praktik əməkdaşlıq üçün yeni imkanlar yaranacaq".