İsmayıllı şəhəri 3 nömrəli tam orta məktəbin Vl sinif şagirdi Nərgiz Fərzəliyeva yeniyetmə olmasına baxmayaraq, çoxsaylı uğurlarına görə diqqət mərkəzində qalmağı bacarıb. O, cüdo ilə 7 yaşından məşğuldur. İndiyədək Dağlıq Şirvan Regional Gənclər və İdman İdarəsinin təşkil etdiyi bir çox idman yarışlarında yüksək nəticələr göstərən Nərgiz bu yaxınlarda daha bir uğura imza atıb.

O, 449-u oğlan, 96-sı qız olmaqla, 545 cüdoçunun mübarizə apardığı U-14 yeniyetmələr arasında Liqa yarışında 36 kq çəki dərəcəsində qızıl medal qazanıb.

Nərgizin sözlərinə görə, cüdoya marağı təsadüfi yaranmayıb. Uşaqlıqdan bu idman növünə həvəsi olan məktəbli qız cüdoda ilk addımlarını müəllimlərinin dəstəyi ilə atıb və elə o vaxtdan bu sahədə daha irəli getməyə qərar verib. İdman sahəsində ilk motivasiyasını müəllimlərindən alsa da, valideynlərinin də dəstəyini hər zaman hiss edib: 

“Uşaqlıqdan cüdoya maraq göstərirdim. U-14 liqa yarışına isə Əkbər və Fərid müəllimin rəhbərliyi ilə hazırlaşdım. Qalib olacağıma inanırdım, çünki qarşıma məqsəd qoymuşdum və müəllimlərimin əziyyətini itirmək istəmirdim”.

Əzmkarlığı və səyləri nəticəsində U-14 liqa yarışının qızıl medalçısı olan Nərgiz bu uğuruna görə çox sevinib. O, məşqlərini hər həftə planlı şəkildə davam etdirir. Səhər idmana, günorta məktəbə gedən cüdocu qız zamanını səmərəli şəkildə bölüşdürməyi bacarır.

O, gələcəkdə Avropa və dünya çempionu olmaq arzusundadır. Bu yolda isə ən böyük silahının əzmkarlıq və nizam olduğunu düşünür.

“Cüdo məndə daha çox əzmkarlıq formalaşdırıb. Məktəbli dostlara isə demək istəyirəm ki, idmanla məşğul olmaq istəyirlərsə, səbirli olsunlar və əzmkarlıq göstərsinlər. Uğur zəhmətlə gəlir”.

Nərgiz Fərzəliyeva kimi yeniyetmələrin hekayəsi təkcə bir uğurun deyil, həm də məqsəd və əzmin simvoludur. Onun kimi uğurlu məktəblilərin sayəsində Azərbaycan idmanının gələcəyi daha parlaq görünür.