Məlum olduğu kimi, ötən gün kimya və biologiya müəllimləri üçün sertifikatlaşdırmanın test imtahanı mərhələsi keçirilib. İmtahanda yüksək nəticə göstərənlər arasında müxtəlif regionlarda çalışan müəllimlər var. 

“Azərbaycan müəllimi” Bakı, Sumqayıt və Abşeron məktəblərində işləyən və sertifikatlaşdırmada yüksək bal toplamış bir neçə müəllimlə həmsöhbət olub, onların təəssüratlarını öyrənib.

“Uğur qazanmaq istəyən müəllimlərə demək istərdim ki, sualları diqqətli oxumaq, fənnini yaxşı bilmək lazımdır”

Qərənfil Quliyeva Şüvəlan qəsəbəsindəki Fuad Fərhadoğlu adına 230 nömrəli tam orta məktəbdə biologiya müəllimi işləyir və sertifikatlaşdırma imtahanında 59 bal toplayıb. MİQ imtahanında 4 il əvvəl iştirak edərək 49 balla işə qəbul edilib. Qeyd edir ki, ixtisası üzrə özü hazırlaşıb, kurikulum üzrə biliklərini artırmaq üçün isə təlimlərdə iştirak edib. 

“Suallar arasında həm asan, həm də nisbətən çətinləri var idi. Çox sevinirəm ki, 59-na düz cavab verdim və yüksək nəticə göstərdim. Dərslikdən əlavə heç bir sual düşməmişdi. Uğur qazanmaq istəyən müəllimlərə demək istərdim ki, sualları diqqətli oxumaq, fənnini yaxşı bilmək lazımdır”. 

“İxtisasını bilən müəllim üçün imtahan çox normal idi” 

Elnarə Verdiyeva 22 ildir ki, Abşeron rayonu Əfqan Qadaşov adına Pirəkəşkül qəsəbə tam orta məktəbində biologiya müəllimi olaraq çalışır və sertifikatlaşdırmada 58 bal toplayıb. 2022-ci ildə MİQ imtahanında iştirak edərək 86,125 bal toplayıb. Uğurlu müəllim qeyd edir ki, 22 illik təcrübəsi olduğu üçün çətinlik çəkməyib: “İxtisasını bilən müəllim üçün imtahan çox normal idi. Kurikuluma aid bir suala səhv cavab verdim. İxtisas üzrə isə mexaniki səhv olub, düz hesab etdiyim cavabın yerinə səhvi qeyd etmişəm. Tövsiyə edərdim ki, müəllimlər əsasən dərsliklərə diqqət yetirsinlər. Suallar Elm və Təhsil Nazirliyinin təsdiqlədiyi dərslikləri tam əhatə edirdi, kənar suallar yox idi”. 

Müəllim əlavə edir ki, müəyyən səbəblərdən imtahana xüsusi olaraq hazırlaşa bilməsə də, gündəlik keçdiyi dərslər sayəsində fənnini yaxşı bilir: “Sırf imtahan üçün vaxt ayırıb hazırlaşmamışdım. Hazırlaşmaq, təbii ki, lazımdır, bununla yanaşı, daima özünü tədris etdiyin fənn üzrə inkişaf etdirmək, müasir dövrün tələblərinə cavab verən yenilikləri öyrənmək, praktiki tapşırıqlar işləmək gərəkdir”.

“Az bal toplayan müəllimlərə tövsiyəm ancaq o ola bilər ki, daha çox çalışsınlar” 

Aynurə Rüstəmova Sumqayıt şəhəri 14 nömrəli tam orta məktəbin biologiya müəllimidir və sertifikatlaşdırma imtahanında 58 bal nəticə göstərib. 19 ildir ki, pedaqoji fəaliyyətlə məşğuldur. Aynurə müəllim də hesab edir ki, suallar çox çətin deyildi, fənnini bilən müəllimin cavab verəcəyi səviyyədə idi: “Suallar arasında çətin, məntiqi düşüncə tələb edənləri də var idi. İmtahana hazırlıq zamanı dərslikləri təkrarlamışdım, kurikulum nəzəriyyəsini oxuyurdum, test tapşırıqları edirdim, onlayn təlimlərə qatılırdım”.

Aynurə Rüstəmova son bir ayda kurikulum üzərində daha çox işlədiyini, sözün əsl mənasında, xeyli zəhmət çəkdiyini deyir: “Asan olmadı, əslində, ancaq müsbət nəticəyə görə bu əziyyətə dəyərdi. Az bal toplayan müəllimlərə tövsiyəm ancaq o ola bilər ki, daha çox çalışsınlar. Hər bir uğurun arxasında həqiqətən əziyyət durur. Pedaqogikanın özü də məntiq, bilik tələb edir və oxumaq lazımdır. Oxumadan alınmır bu iş”.