Kürdəmir rayonu Qarasu kənd E.Qurbanov adına tam orta məktəbində Mərkəzi Aran Regional Təhsil İdarəsinin təşkilatçılığı ilə şəhid müəllim Qoşqar Ömərovun xatirəsinə həsr olunmuş “Riyaziyyatı tarixə dəyişən qəhrəman!” adlı intellektual bilik yarışı keçirilib.

İdarədən “Azərbaycan müəllimi”nə verilən məlumata görə, yarışda 1 şəhər və 6 rayon ümumi təhsil müəssisəsində təhsil alan şagirdlərdən ibarət 7 komanda iştirak edib.

Yarışda “Kürdəmir” komandası 1-ci,  “Ağdaş” komandası 2-ci, “Ucar” komandası 3-cü yerə layiq görülüb.

Qeyd edək ki, Qoşqar Ömərov 9 fevral 1994-cü ildə Kürdəmir rayonunun Şilyan (Qarasu) kəndində müəllim ailəsində anadan olub. 2011-ci ildə Kürdəmir rayonu Qarasu kənd orta məktəbini, 2011-2015-ci illərdə isə  Azərbaycan Dövlət Pedaqoji Universitetinin “Riyaziyyat-informatika müəllimliyi” ixtisasını bitirib. 2018-ci ildə MİQ imtahanında 57 bal toplayaraq Abşeron rayonu Masazır kənd 5 nömrəli tam orta məktəbində riyaziyyat müəllimi kimi pedaqoji fəaliyyətə başlayıb. 44 günlük Vətən müharibəsi başlayanda qələmi silaha dəyişən Qoşqar Ömərov Füzuli, Cəbrayıl, Xocavənd və Şuşanın işğaldan azad olunmasında gedən döyüşlərdə iştirak edərək şəhidlik zirvəsinə ucalıb. O ölümündən sonra "Vətən uğrunda", “Xocavəndin azad olunmasına görə”, Füzulinin azad olunmasına görə” və “Şuşanın azad olunmasına görə” medalları ilə təltif olunub.