Lənkəran-Astara Regional Təhsil İdarəsinin tabeliyindəki 18 ümumtəhsil müəssisəsində optimallaşma prosesi həyata keçirilib.

Bunu Lənkəran-Astara Regional Təhsil İdarəsi “Azərbaycan müəllimi”nin sorğusuna cavab olaraq açıqlayıb.

İdarədən qeyd edilib ki, Lerik rayonunda şagirdlərin daşınması ilə bağlı məsələ də həllini tapıb: “8-i Lerik rayonunda olmaqla, ümumilikdə 18 məktəbdə optimallaşma gedib. Lerik rayonunda şagirdlərin daşınması ilə bağlı məsələ də həllini tapıb. Şagird sayının kifayət olmamasına görə optimallaşmaya gedən LARTİ-nin tabeliyindəki həmin məktəblərin 4-ü Cəlilabad, 2-si Masallı, 4-ü Yardımlı rayonunda yerləşir”.

Xatırladaq ki, bir müddət əvvəl elm və təhsil naziri Emin Əmrullayev optimallaşma ilə əlaqədar bu sözləri deyib: “Ölkədə fəaliyyət göstərən təxminən 4 400 məktəbin 1 500-də 100-dən az şagird təhsil alır. Şagird sayı aşağı olan məktəblərdə bir şagirdə xərclənən vəsait kifayət qədər böyük, tədrisin keyfiyyəti isə aşağıdır. Bəzi hallarda bu məbləğ paytaxtda fəaliyyət göstərən özəl təhsil müəssisələrinin təhsil haqqından da çoxdur (məsələn, 5 nəfər şagirdi olan məktəbdə bir nəfər şagirdə düşən illik xərc 25-27 min manatdır, 10-15 nəfər şagirdi olan məktəbdə isə bu xərc 13-15 min manatdır). Daha dayanıqlı və keyfiyyətli təhsil imkanlarının yaradılması məqsədilə qeyd olunan azkomplektli məktəblərin rasionallaşdırılması həyata keçirilir və bu proses mərhələli şəkildə aparılacaq”.