Magistratura səviyyəsində təhsil alan tələbələrin sosial təhsil tələbə kreditindən (TTK) yararlanması üçün bal məhdudiyyəti müəyyən olunmayıb. 

Bu barədə “Azərbaycan müəllimi”nin sorğusuna cavab olaraq Təhsil Tələbə Krediti Fondundan (TTKF) məlumat verilib.

Fondun açıqlamasına görə, sosial TTK üçün tələbənin və ya onun valideyninin sosial statusu əsas götürülür. 

TTKF hansı hallarda sosial kreditə müraciətin mümkün olduğunu, hansı tələbələrin təhsillərinin birinci tədris ilinin ilk semestrindən (yarımildən) sosial TTK-dən istifadə etmək hüququna malik olduğunu açıqlayıb.

Fondun məlumatına görə, sosial TTK üçün tələbənin və ya onun valideyninin sosial statusu əsas götürülür. Belə ki, bu hallarda aşağıdakı tələbələr təhsillərinin birinci tədris ilinin ilk semestrindən (yarımildən) sosial TTK-dən istifadə etmək hüququna malikdirlər:

• Ünvanlı dövlət sosial yardımı alan ailələrin üzvləri;
• 3-cü dərəcə əlilliyi olanlar;

• Ailə başçısını itirməyə görə əmək pensiyası və ya sosial müavinət alması

Hər iki valideyni (tək valideyni olduqda isə həmin şəxs) aşağıda qeyd olunan kateqoriyaların hər hansı birinə aid olanlar:
• 1-ci və ya 2-ci dərəcə əlilliyi olanlar;
• İşsiz kimi qeydiyyatda olanlar;
• Yaşa görə əmək pensiyası alanlar;
• Yaşa görə sosial müavinət alanlar
• Ailə başçısını itirməyə görə pensiya alması;
• Tələbənin bir valideyni 1-ci qrup əlil, digəri isə ona qulluq etdiyinə görə Prezident təqaüdü alırsa;
• Valideynlərdən biri azadlıqdan məhrumetmə və ya məhdudlaşdırma cəzası alıbsa.
 Göstərilən şərtlərdən hər hansı biri tələbəyə və ya valideyninə aid olduqda sosial TTK almaq mümkündür. Əgər bu meyarlara uyğunluq yoxdursa, tələbə standart növ təhsil kreditinə müraciət edə bilər.

Qurumdan o da bildirilib ki, standart TTK üçün bəzi şərtlər nəzərdə tutulur:

– Ümumi orta müvəffəqiyyət göstəricisi (ÜOMG) 71 bal və yuxarı olmalıdır;
– Tələbə illik təhsil haqqının 20 faizini özü ödəməlidir.

Bəs tələbə birinci tədris ilinin ilk semestrindədirsə və ÜOMG formalaşmayıbsa?

Tələbə Təhsil Krediti Fondundan verilən məluatda qeyd edilib ki, bu zaman Dövlət İmtahan Mərkəzinin keçirdiyi qəbul imtahanının nəticələri əsas götürülür. Bu halda standart kredit üçün minimum 50 bal, xüsusi qabiliyyət tələb edən ixtisaslarda isə minimum 30 bal tələbi mövcuddur. 

Qeyd edək ki, iyulun 24-dən ali təhsil müəssisələrinin magistratura səviyyəsinə qəbul olan şəxslərin sənəd qəbulu, deyni zamanda, 2025–2026-cı tədris ilinin payız semestri üzrə təhsil tələbə krediti üçün müraciətlərin qəbulu başlayıb. Müraciətlər e-ttkf.edu.az portalı vasitəsilə elektron qaydada həyata keçirilir.
Magistraturaya qəbul olan tələbələr portal.edu.az vasitəsilə qeydiyyat zamanı eyni anda TTKF-in portalına da daxil olaraq təhsil krediti üçün müraciət edə bilərlər.

Xatırladaq ki, təhsil tələbə kreditləri yalnız əyani və ödənişli əsaslarla təhsil alan tələbələr üçün nəzərdə tutulur və iki növdə təqdim olunur. Sosial təhsil tələbə krediti illik 2 faizlə, standart təhsil tələbə krediti illik 6 faizlə verilir.