30-31 oktyabr tarixlərində Naxçıvan Dövlət Universitetində hibrid formada “İnkişaf və innovasiyalar: Süni intellekt və maşın öyrənməsi” I beynəlxalq elmi-praktik konfransı keçiriləcək.

“Azərbaycan müəllimi” xəbər verir ki, konfrans Azərbaycan Texniki Universiteti (Azərbaycan), Naxçıvan Dövlət Universiteti (Azərbaycan), Daşkənd Dövlət Texniki Universiteti (Özbəkistan), Asiya Sakit Okean Texnologiya və İnnovasiya Universiteti (Malaziya) və Mingəçevir Dövlət Universitetinin (Azərbaycan) birgə təşkilatçılığı, bir sıra xarici və respublika universitetlərinin iştirakı ilə baş tutacaq.

“İnkişaf və innovasiyalar: Süni intellekt və maşın öyrənməsi” konfransı tədqiqatçıları, sahə mütəxəssislərini, siyasətçiləri və alimləri bir araya gətirərək süni intellektin və maşın öyrənməsinin gələcəyini müzakirə etmək və formalaşdırmaq məqsədi daşıyan beynəlxalq bir forumdur.

Konfransın əsas məqsədləri süni intellekt və maşın öyrənməsi sahəsindəki ən son tədqiqat və texnoloji yenilikləri təqdim etmək, müxtəlif sahələrdə real tətbiq nümunələrini nümayiş etdirmək, məlumatın keyfiyyəti, modelin izah edilə bilməsi, miqyaslana bilməsi və alqoritmik ədalət kimi əsas məsələləri araşdırmaq, süni intellekt dövründə inkişafı dəstəkləmək üçün akademiya, sənaye və hökümət arasında əməkdaşlığı təşviq etməkdir.
İştirakçılar bu texnologiyaların nəzəri əsaslarından praktik tətbiqlərinə qədər geniş mövzuları əhatə edən aparıcı mütəxəssislərdən bilik əldə etmək imkanı qazanacaqlar.