Respublika fənn olimpiadalarının (RFO) final mərhələsi hər il olduğu kimi, bu il də öz bilik və bacarığı ilə seçilən məktəbliləri önə çıxardı. Astara rayonu Məhərrəm Abiyev adına Vaqo kənd tam orta məktəbinin IX sinif şagirdi Nuray Məmmədzadə kimya, Lənkəran rayonu Xolmili kənd tam orta məktəbinin şagirdi Əliyyiəkbər Şirinli informatika fənni üzrə RFO-da bürünc medala layiq görülərək bölgənin təhsil uğurlarına yeni bir səhifə əlavə etdilər.

Elm, zəhmət və inamla yoğrulan uğur hekayələri bir çoxlarına yol göstərir, ruh verir. “Azərbaycan müəllimi” belə uğurlu şagirdlərdən ikisini oxucularına təqdim edir.

“Bu uğur üçün çox çalışdım” 

Nuray üçün bu uğur sadəcə medal deyil, onun yorulmadan çalışmağının, müəllimlərinin dəstəyinin nəticəsidir. “RFO-da qailib olmaq böyük fəxrdir. Buna nail olmaq üçün çox çalışmalı, zəhmət çəkməlisən”, – deyə Nuray bildirib. 

O, 7-ci sinifdə kimya üzrə ilk bürünc medalını qazandıqdan sonra bu sahəyə olan marağının daha da dərinləşdiyini deyir. 

“Çox çalışdım, xüsusən zəif olduğum mövzular üzərində çox dayandım”, – söyləyən Nuray müəllimlərinin və ailəsinin ona dəstəyini xüsusi vurğulayır: “Bu elmin dərinliklərinə yiyələnməyimdə əsas zəhməti müəllimlərim çəkib. Ailəm də hər zaman tutduğum yolda mənə dəstək olub”.

Nuray finalda yaşadığı həyəcanı belə xatırlayır: “Finalda həyəcan keçirirdim, lakin sualları görəndə anladım ki, qalib olaram”. 

Nuray kitab oxumağı çox sevir, xüsusən xarici ədəbiyyata maraq göstərir. Gələcəkdə həkim olmaq, konkret olaraq, neyrocərrah peşəsini seçmək niyyətindədir. Uğura gedən yolda öz yaşıdlarına sadə, amma təsirli bir tövsiyə verir: “Çox oxusunlar, heç vaxt ruhdan düşməsinlər”.

Nuray müsahibənin sonunda minnətdarlığını dilə gətirməyi də unutmur: “Bu səviyyəyə qalxmağımın səbəbkarı hər zaman uğurlarıma sevinən müəllimlərim və məktəbimdir. Buna görə də mənə dərs deyən bütün müəllimlərimə təşəkkür edirəm”.

“Kreativ düşüncə qələbə gətirir” 

Əliyyiəkbər RFO-da artıq üçüncü dəfədir ki, iştirak edib. Bu dəfə nəticə onu əvvəlkilər qədər həyəcanlandırmayıb: “Ən azı bürünc medal alacağıma inanırdım, ona görə bu medal ilk medalım qədər sevinc hissləri oyatmadı”. 

Onun elmi uğurları bununla bitmir. RFO nəticələrindən sonra Beynəlxalq Kibertəhlükəsizlik Olimpiadası – ICO 2025 (Sinqapur) komandasına seçilən uşaqlar arasına “birincilər-birincisi” kimi daxil olub: “Olimpiadada iştrak etməyin özü belə insanı çox həvəsləndirir, amma bu dəfə, əsasən, Sinqapurdakı beynəlxalq yarışa hazırlaşırdım”.

Əsasən, dinamik proqramlaşdırma (DP) və implementasiya tələb edən suallar üzərində çalışdığını deyən Əliyyiəkbər kreativ düşüncə tərzinin vacibliyini qeyd edir: “Kreativ düşüncə tərzi qələbə gətirir”.

Bu uğur yoluna 9 illik təhsilini aldığı Lənkəran rayonu Ə.Nəsirov adına Tütəpeştə kənd ümumi orta məktəbinin direktoru Rövşən Əliyevin təşviqi ilə başladığını deyir: “Düşünürəm, o olmasa, olimpiadalara qatılmayacaqdım. Hər dəfə ona minnətdarlığımı bildirməyi özümə borc bilirəm”. 

Ailəsi, xüsusilə bacısı onun əsas motivasiya mənbələrindəndir: “Ruhdan düşəndə ən çox bacım məni motivasiya edirdi”. 

Əliyyiəkbərin yarışda yaşadığı əsas çətinlik zamanı düzgün bölə bilməməsi olub: “Vaxtı düzgün bölə bilmirdim və bu, yarışda bal itirməyimə səbəb olurdu. Riyazi  yanaşma ilə bunu aradan qaldırmağa çalışmışdım, amma RFO-da bunu istifadə etmədim və zaman problemi yaşadım”. 

Əliyyiəkbərin kimya sahəsində təhsil almaq planı yoxdur, lakin olimpiadaların verdiyi təcrübəni yüksək qiymətləndirir. “Olimpiada prosesi uzun çəkir və əsas məsələ bundan zövq almaqdır, medal almaq deyil. Burada qazanılan təcrübə medaldan daha üstündür. Həmyaşlarıma da tövsiyə edirəm ki, ingilis dilini yaxşı öyrənsinlər və özlərinə inansınlar. Əsas uğur özünəinamla başlayır”, – deyə qeyd edir.

Əliyyiəkbər üçün müəllim dəstəyi xüsusilə önəmlidir. Riyaziyyat və informatika müəllimi Minayə Rəhmanovanın ona vaxtilə ADA Universitetində təhsil almağı tövsiyə etdiyini xatırlayır: “O vaxtlar 9-cu sinif şagirdi idim. Üstündən 2 il keçdi və artıq həmin universitetə sənəd verirəm”.

Bu iki istedadlı gəncin hekayəsi göstərir ki, təhsildə uğur üçün zəhmət, məqsəd və doğru yönləndirmə əsasdır. Onların yoluna işıq tutan müəllimləri, ailələri isə bu uğurların görünməyən, lakin əvəzsiz qəhrəmanlarıdır.