Martın 9-da keçirilən XI sinf buraxılış imtahanında ən yüksək nəticə göstərən 20 şagirddən biri də Lənkəran-Astara Regional Təhsil İdarəsinin tabeliyində fəaliyyət göstərən Astara rayonu N.Kərimov adına Ərçivan qəsəbə 3 nömrəli tam orta məktəbin şagirdi Əliəkbər Ağayevdir. 

“Azərbaycan müəllimi” Əliəkbərin uğur hekayəsinə qısa nəzər salıb. 

Hər bir uğurun arxasında böyük zəhmət, fədakarlıq və inancla dolu bir yol durur. Bu fikrin canlı sübutlarından biri də Əliəkbərdir. O, buraxılış imtahanında maksimum nəticə göstərərək həm ailəsinin, həm də müəllimlərinin qürur mənbəyinə çevrilib. 

Əliəkbərin sözlərinə görə, bu uğurun ən əsas sirri özünə güvənmək və hədəfinə inanmaq olub: “Özümə güvənirdim. İnanırdım ki, bu balı toplayacağam. Əlbəttə, valideynlərimin də dəstəyi böyük rol oynayıb. Onların inamı məni daha da ruhlandırırdı”. Əliəkbər deyir ki, imtahana hazırlıq dövründə bütün fənlərə eyni dərəcədə önəm verib. Çətinliklərlə qarşılaşdığı hallarda isə müəllimlərinin dəstəyindən istifadə edib: “Bütün fənlərə eyni zaman ayırdığım üçün hamısının öhdəsindən gələ bilirdim. Çətinlik çəkdiyim zaman da müəllimlərim yanımda olurdu, suallarımı səbrlə cavablandırırdılar”.

“Planlı çalışma və düzgün vaxt bölgüsü”

Onun uğur formulu sadə, lakin hər kəs üçün nümunə ola bilər: planlı çalışma və vaxtın düzgün bölüşdürülməsi. Əliəkbər deyir ki, dərslə yanaşı istirahətə də vaxt ayırmaq ona daha uğurlu nəticələr əldə etməyə imkan verib: “Cədvəlimi düzgün planlaşdırdığım üçün həm dərsə, həm də istirahətə vaxt ayıra bilirdim. Yorğun beyinlə dərs oxumağın faydası olmur”.
Əliəkbər uğur yolunda ailəsinin dəstəyini xüsusilə vurğulayır. Onun sözlərinə görə, bu gün qazandığı nailiyyətlərin bünövrəsi ibtidai sinifdə qoyulub: 

“Ən böyük əmək anamındır. İbtidai sinifdə bünövrəmi qoymaqda onun rolu danılmazdır. Bundan başqa, atamın riyazi biliklərindən də çox faydalanmışam. Hər zaman mənə dəstək olublar”. Gələcək arzusu isə bir çox gəncin seçmək istədiyi, şərəfli və məsuliyyətli bir peşədir. Əliəkbər həkim olmağı arzulayır və bu yolda səylə çalışmağa davam edir.

Əliəkbər Ağayevin hekayəsi sübut edir ki, qarşıya məqsəd qoyduqda, ona doğru inamla və əzmlə irəlilədikdə uğur qaçılmaz olur. Qeyd edək ki, tam (11 illik) orta təhsil səviyyəsi üzrə martın 9-da keçirilmiş keçirilən buraxılış imtahanında 20 nəfər 300 bal toplamaqla ən yüksək nəticəni əldə edib.