“Qarabağ Universiteti fəaliyyətə başlayandan burada tədris yalnız Azərbaycan bölməsi üzrə təşkil edilib. Ötən tədris ilində olduğu kimi, 2025/2026-cı tədris ili üçün də universitetə tələbə qəbulu yalnız Azərbaycan dili bölməsi üzrə həyata keçiriləcək”.
“Azərbaycan müəllimi” xəbər verir ki, bunu Qarabağ Universitetinin rektoru Şahin Bayramov bildirib.
“Təməl yanaşmamız ondan ibarətdir ki, qəbul Azərbaycan dili bölməsi üzrə aparılsa da, tələbələrimizin ingilis dili bacarıqlarının yüksək səviyyədə formalaşması üçün bütün zəruri addımlar atılsın”, – deyə qeyd edib.
Şahin Bayramovun sözlərinə görə, Qarabağ Universitetinin fəaliyyətə başladığı ilk gündən Beynəlxalq Dil Mərkəzi mövcuddur. Bu mərkəz tələbələrə yüksək səviyyədə ingilis dili bacarıqları əldə etmək imkanı yaradır: “Bu isə bizə növbəti kurslarda tələbələrimizə ixtisas fənlərini ingilis dilində tədris etməyə imkan verəcək. Eyni zamanda, tələbələrimiz öz ixtisasları üzrə dünyada qəbul olunmuş, ən müasir dərsliklərdən (bu dərsliklərin əksəriyyəti xarici dillərdədir) istifadə edərək biliklərini genişləndirə biləcəklər. Qarşıdakı perspektivdə isə xarici ölkələrdən dəvət olunan professorlardan dərs almaq imkanları da yaradılacaq”.
Rektor bildirib ki, universitetin Beynəlxalq Dil Mərkəzinin təqdim etdiyi imkanlardan yararlanmaqla tələbələr müxtəlif beynəlxalq mübadilə proqramlarında da iştirak edə biləcəklər: “Bu baxımdan Qarabağ Universitetinin tələbələrinin yüksək səviyyədə ingilis dili bacarıqlarına malik olacağı birmənalıdır.
Ona görə də abituriyentlərimiz bu fürsətlərdən yararlanaraq gələcəkdə həm də beynəlxalq əmək bazarında özlərini reallaşdırmaq imkanına sahib ola bilərlər”.
Digər xəbərlər
Digər xəbərlər tapılmadı
Qəzetimizə abunəlik
"Azərbaycan müəllimi" qəzetindən ən son xəbərləri və xüsusi təklifləri əldə etmək üçün abunə olun
Bölmələrimiz
2025 © "Azərbaycan müəllimi" qəzeti. Bütün müəllif hüquqları qorunur. Məlumatdan istifadə zamanı istinad mütləqdir. Məlumat internet səhifələrində istifadə edildikdə hiperlink qoyulmalıdır.
Şərhlər