İyunun 24-də Naxçıvanda ölkə üzrə kimya və biologiya müəllimləri üçün keçirilən təhsilverənlərin sertifikatlaşdırılması prosesinin test imtahanı mərhələsində 67 müəllimin 66-sı iştirak edib və 98,5 faiz davamiyyət qeydə alınıb.

"Azərbaycan müəllimi" sertifikatlaşdırma imtahanının keçirildiyi Naxçıvan şəhəri 4 nömrəli tam orta məktəbdə olub və yüksək nəticə göstərən müəllimlərlə söhbətləşib.

Biologiya fənni üzrə 57 bal toplayan Kəmalə Tağızadə Ordubad rayonu Aza kənd tam orta məktəbin müəllimidir. Keçən il MİQ imtahanında 60,1 bal toplayıb və Naxçıvan şəhərindən hər gün bu kəndə gedib-gələrək dərs deyir. Əlavə edir ki, imtahanda yüksək nəticə əldə etdiyinə görə çox sevinclidir:

“Şəffaflığı təmin etdiklərinə görə hər kəsə təşəkkür edirəm. İmtahan çox rahat idi, suallar müəllimlərin pedaqoji təcrübəsinə uyğundur. Çox razı qaldıq. Bütün həmkarlarıma uğurlar arzu edirəm”.

Səmayə Səfərli Ordubad şəhəri tam orta internat məktəbinin biologiya müəllimidir. Sertifikatlaşdırma imtahanında 56 bal toplayan müəllim iki ildir ki, burada çalışır. Deyir ki, sertifikatlaşdırma imtahanında yaxşı bal toplayan müəllim kimi şagirdlərinin gözündə daha da yüksəlmək istəyib. Bu düşüncəsi onu daha çox həyəcanlandırıb:

“Hər səviyyədə suallar var idi, dərsdənkənar suallar yox idi. Hətta bundan daha çox bal gözləyirdim, çox çalışmışdım. Sadəcə, bir az həyəcanlandım”.

Culfa rayonu Kırna kənd tam orta məktəbinin müəllimi Nərmin Rəhimovanın 15 illik müəllimlik təcrübəsi var. 55 bal toplayan müəllim deyir ki, suallar orta səviyyədə idi:

“Asan, orta və çətin suallar var idi. İmtahan çox rahat keçdi. Sertifikatlaşdırma ailə büdcəmizə də müsbət təsir göstərəcək”.

“Suallar məktəb dərsliklərini əhatə edirdi”

Aysu Şahməmmədova Ordubad rayonu Baş Dizə kənd orta məktəbində biologiya müəllimidir. 55 bal toplayan müəllim Naxçıvan şəhərində yaşayır. MİQ imtahanı ilə işə qəbul olunub. 4 ildir ki, bu kənddə çalışır:

“Suallar çox yaxşı tərtib olunmuşdu. Kurikulum sualları daha çox sinfin idarə olunması ilə bağlı idi. Hazırlaşdığım mövzular çərçivəsində suallar düşmüşdü, məktəb dərsliklərini əhatə edirdi. Həm də maaşım artacağı üçün çox sevincliyəm. İmtahan verəcək müəllimlər həyəcanlanmasınlar”.

Ramilə Bağırova Culfa rayonu Bənənyar kənd tam orta məktəbində kimya fənnindən dərs deyir. Bu fənn üzrə ən yüksək balı o toplayıb. 54 bal toplayan müəllimin 10 illik pedaqoji stajı var:

“Yüksək bal topladığım üçün sevinirəm. Plan üzrə hazırlaşırdım və buna görə də yüksək nəticə əldə edə bildim. Hər kəsə uğurlar arzulayıram”.

Qeyd edək ki, sertifikatlaşdırma prosesində ümumilikdə Naxçıvan Muxtar Respublikasının ümumtəhsil müəssisələrinin 350-yə yaxın müəlliminin iştirakı nəzərdə tutulur. Sabah sertifikatlaşdırma imtahanlarının sonuncu günüdür.