Şirvan-Salyan Regional Təhsil İdarəsi üzrə təhsil işçilərinin ənənəvi sentyabr konfransı keçirilib. 

“Azərbaycan müəllimi” xəbər verir ki, Biləsuvar rayonunda keçirilən konfransda regional idarənin rəhbərliyi, rayon təhsil sektorlarının müdirləri, məktəb direktorları və müavinləri, həmkarlar təşkilatlarının sədrləri iştirak ediblər.

Tədbirdə Şirvan-Salyan Regional Təhsil İdarəsinin müdiri Rəşad Musayev ötən tədris ilinin yekunları ilə bağlı hesabatla çıxış edib. İdarə müdiri bildirib ki, regional idarənin tabeliyində 178 təhsil müəssisəsi fəaliyyət göstərir. Respublika üzrə təhsil alan şagirdlərin 4 faizi bu regional idarənin payına düşür.

O, həmçinin 4-cü, 6-cı siniflər üzrə keçirilən monitorinqlərin və 9-cu sinif buraxılış imatahanının nəticələri barədə geniş məlumat verib: “Ötən tədris ilində 4-cü və 6-cı siniflər üzrə keçirilən monitorinqlərin nəticələri  əvvəlki illərlə müqayisədə bizə daha çox təhlil və inkişaf üçün imkanlar açıb. 9-cu siniflərin buraxılış imtahanlarının nəticələrində isə irəliləyiş baş verib. Həmçinin 4-cü siniflərin monitorinq nəticələrinə əsasən 26, 6-cı siniflərin monitorinq nəticələrinə görə isə 69 təhsil müəssisəsinin nəticələrində irəliləyiş olub”.

Rəşad Musayev həmçinin əlavə edib ki, regionun təhsil işçilərini qarşıdan çox gərgin iş rejimi gözləyir: “Çünki növbəti tədris ilində zəif nəticələrin azaldılması, yüksək nəticələrin isə artırılması üçün qarşıya konkret hədəflər qoyulub”. İdarə müdiri qarşıda duran hədəflərə çatmaq üçün təhsil işçilərinin birgə səylərinin vacibliyini diqqətə çatdırıb. 

Sonra  çıxış edən idarənin Tədrisin keyfiyyəti sektorunun müdiri Mahir Zahidov təhsil müəssisələri qarşısında duran vəzifələrə toxunaraq bildirib ki, planlı və məqsədyönlü işlər həyata keçirildikdə yekun nəticələr də daha ürəkaçan olacaq. 

Sonra çıxış edən Şirvan təhsil sektorunun müdiri Varis Qasımlı, Milli Qəhrəman Mübariz İbrahimov adına Biləsuvar Bağça-Məktəb-Lisey Kompleksinin direktoru Aqşin Bağırov, Biləsuvar şəhər Əlövsət Eynullayev adına 4 nömrəli tam orta məktəbin direktoru Elşən Ağazadə, Neftçala rayonu Qismət Nurəliyev adına Xolqaraqaşlı kənd tam orta məktəbinin direktoru Ruhəngiz Nəcəfova, Salyan rayonu Elxan Ağayev adına Arbatan kənd tam orta məktəbinin direktoru Gülər Babayeva rəhbərlik etdikləri təhsil müəssisələrinin uğurları, əməkdaşlıqların qurulması, qoyulan hədəflərə çatmağın yolları barədə çıxış edib, təkliflər səsləndiriblər.

Konfrans panel müşavirələrlə davam edib, müəllimlərlə  ibtidai təhsil səviyyəsi, Azərbaycan dili və riyaziyyat fənləri üzrə  səmərəli fikir mübadiləsi aparılıb.