Alimlər süni intellektin insanlara xas supergücünü kəşf ediblər. 

“Azərbaycan müəllimi” xəbər verir ki, Stenford Universitetinin professoru Maykl Kosinski dil modelləri insan şüurunun bir növünü təqlid etdiyi ilə bağlı araşdırma aparıb.

Böyük Dil Modelləri (LLM) mətnləri analiz edib yeni sözlər proqnozlaşdıran süni intellekt sistemləridir. Onlar “transformator” adlanan neyron şəbəkə arxitekturasından istifadə edərək əlaqələri müəyyən edir. Şüur nəzəriyyəsi insanın başqalarının düşüncələrini və duyğularını anlama qabiliyyətini təsvir edir və sosial əlaqələrdə mühüm rol oynayır. Bu modellər mətn yaratmaqla yanaşı, psixoloji və məntiqi prosesləri də nəzərə almalıdır.

M.Kosinski dil modellərinin şüur və inancları başa düşməsini yoxlamaq üçün psixoloji testlərdən istifadə edib. Tapşırıqlarda modellər qəhrəmanın yanlış inanclarını düzgün proqnozlaşdırmağa çalışıb. İlk versiyalar buna tam cavab verməsə də, GPT-3 və ChatGPT-4 kimi daha inkişaf etmiş modellər uğurla bu tapşırıqları həll edib. ChatGPT-4, 75 faizlik müvəffəqiyyətlə mürəkkəb vəziyyətləri başa düşüb.

Bununla yanaşı, modelin 25 faizlik uğursuzluqları bəzi səhvlərin statistik qanunauyğunluqlardan qaynaqlandığını göstərir. Tədqiqatçı bu nəticələrin süni intellektin şüur anlayışına yaxınlaşdığını göstərsə də, hələ də məhdud olduğunu qeyd edir.

Araşdırmalar gələcəkdə dil modellərinin daha mürəkkəb ssenarilərdə nə qədər inkişaf edəcəyini və insanla süni intellektin idrak fərqlərini araşdırmağa yönələcəyini göstərir. Kosinski süni intellektin üstün qabiliyyətlərə sahib olmağına dair həyəcanlı və narahatedici bir dövrün yaxınlaşdığını vurğulayıb.