Amil Alesov Azərbaycan Dövlət Bədən Tərbiyəsi və İdman Akademiyasında sosial tələbə krediti ilə oxuyur. Öz borcunu özü qaytarmaq istəyən gənclərdəndir. Çox iddialıdır, yüksəlmək, inkişaf etmək, böyük imkanlara sahib olmaq istəyir.

Müəllimliyi seçdi

Amil Rusiyada doğulub, böyüyüb. Ancaq kökünə bağlı olduqlarından bir ayağı Azərbaycanda - Gəncədə olub. Ali təhsil müəssisələrinə qəbul imtahanlarına da burada qatılıb, ancaq bir əskiklə: “Atam rəhmətə gedən il mən ali məktəbə daxil oldum”.

Hazırda Azərbaycan Dövlət Bədən Tərbiyəsi və İdman Akademiyasının (ADBTİA) III kurs tələbəsidir. Fiziki tərbiyə müəllimi olmaq istəyir:
“Bu illər ərzində dərslərimdə məsuliyyətli və çalışqan olmağa səy göstərdim, təhsilimə kəsirsiz davam edirəm”.

Ailədə böyük itkinin nə olduğunu bildiyi kimi, ailədən verilən dəstəkdən güc almağı da öyrənib: “Atamın vəfatı ailəmiz üçün ağır itki oldu və vəziyyətimizi xeyli çətinləşdirdi. Anam səhhətindəki problemlərə görə işləyə bilmədiyi üçün ailəmizin yükü qardaşımın üzərinə düşdü. O, universitetə hazırlaşdığım dövrdə, sözün əsl mənasında, yanımda oldu, məhz onun həm mənəvi, həm maddi dəstəyi ilə qarşıma qoyduğum hədəfə çata bildim. Mən universitetə qəbul olduqdan az sonra qardaşım da hərbi xidmətə getdi. İndi onun üçün çox darıxıram, səbirsizliklə yolunu gözləyirəm. 2026-cı ilin yanvarında xidmətini başa vuraraq evimizə dönəcək”.

“Fondun köməyi məni dövlətimə daha da bağlı edir”

Ali təhsil almağa başlayana qədər qardaşından dəstək alan Amil onun gedişindən sonra dövlətin yaratdığı imkanlardan yararlanmaq qərarına gəlib: “Təhsil Tələbə Krediti Fonduna müraciətim də məhz ailəmizin mövcud maddi çətinlikləri ilə bağlıdır. Dövlətimizin yaratdığı bu imkan mənim üçün böyük dəstək oldu. Fondun köməyi sayəsində təhsilimi davam etdirə bilirəm və bu məni dövlətimə daha da bağlı edir”.

Amil deyir ki, bu dəstək olmasaydı, o, yəqin ki, oxuya bilməyəcəkdi: “Çətinliklərimiz çox olur, xüsusən qardaşım hərbi xidmətə gedəndən sonra. Əgər təhsil krediti götürmək imkanım olmasaydı, təhsilimi yarımçıq qoyub işləməliydim, bu da oxuya bilməyəcəyim, mənim kimi qardaşımın da əziyyətinin puç olacağı demək idi. Düzdür, yenə işləyirəm, amma tətil dövründə. Çünki fond mənim, sadəcə təhsil haqqımı ödəyib. Anamla bərabər yaşayırıq və onun səhhətində müəyyən problemlər var. Ona görə ailənin yükü indi bir az da mənim üzərimə düşür”.

Hər ikisinin etimadını doğruldacaq

Amil müəllimliyi seçib və işində yüksəlmək, ona olan ümidləri doğrultmaq niyyətindədir: “Əsas məqsədim universiteti uğurla başa vurmaq, ailəmə daha rahat, təminatlı bir həyat bəxş etməkdir. İstəyirəm ki, anam və qardaşım maddi sıxıntı çəkməsinlər. Ailəmin qürur duyacağı bir gənc olmaq əsas hədəfimdir”.

Amil bu gün özünü bir qardaşına, bir də dövlətinə borclu sayır: “Qardaşımın qayğısı və dəstəyi olmasaydı, bəlkə tələbə ola bilməyəcəkdim. Dövlətimizin qayğısı, yəni Təhsil Tələbə Krediti Fondunun dəstəyi olmasaydı, məzun ola bilməyəcəkdim. Hər ikisinin dəstəyini unutmayacağam. Bu etimadı doğrultmaq üçün var gücümlə oxumağa, gələcəkdə ailəmə yaxşı övlad, ölkəmə faydalı vətəndaş olmağa çalışacağam”.