Astaranın Şiyəkəran kəndindən olan Nurlan Dadaşov uğurları ilə həm ailəsini, həm də doğulduğu el-obanı sevindirən gənclərdəndir. O, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”nın qalibi olaraq ABŞ-nin nüfuzlu Berkli Kaliforniya Universitetində “Hüquqşünaslıq” ixtisası üzrə magistr təhsili alacaq. Dünya universitetlərinin reytinqində ilk yerlərdən birini tutan bu ali məktəbə qəbul xəbəri Nurlan üçün xüsusi önəm daşıyır.

“Əslində bundan əvvəl başqa universitetlərdən də qəbul təklifi almışdım, amma daha həyəcanla gözlədiyim Berkli Kaliforniya Universiteti idi. Qəbulun cavabı gecə saatlarında gəldiyinə görə həyəcandan dərhal dərk edə bilmədim. Səhər bu xəbəri bütün ailə üzvlərimlə paylaşdım”, – deyə Nurlan o həyəcanlı anları xatırlayır.

2021-ci ildə Dövlət İmtahan Mərkəzinin keçirdiyi qəbul imtahanlarında 646 bal toplayan və Bakı Dövlət Universitetinin SABAH qruplarında “Hüquqşünaslıq” ixtisası üzrə bakalavr təhsilini 96.72 ÜOMG ilə başa vuran Nurlan həmçinin IELTS imtahanından 7 bal toplayıb. Onun uğur yolu asan olmayıb. Dövlət Proqramına müraciət zamanı yüksək rəqabətlə üzləşən gənc deyir ki, gənclərin xaricdə təhsil alması Azərbaycanın gələcək inkişafı üçün böyük töhfədir: “Düşünürəm ki, gənclərin beynəlxalq təcrübə qazanması onların xarici mühitdə öyrəndiyi innovativ biliklərin ölkəmizdə də müxtəlif yöndə tətbiqinə kömək edəcək. Bu, ölkəmizin gələcək inkişafına müsbət yöndə təsir edəcək əsas amillərdən biridir”. 

Gələcək planlarından da danışan Nurlan hüququn yeni istiqamətlərinə diqqət çəkir: “Süni intellekt və kibertəhlükəsizlik sürətlə inkişaf edir. Yaxın illərdə bu sahələrdə yeni normativ aktlara ehtiyac yaranacaq. Mən də bu istiqamətdə aparılacaq işlərə töhfə vermək istəyirəm”. 

Nurlanın 10 il sonra özünü harada və hansı mövqedə görməyi ilə bağlı suala cavabı da maraqlı oldu: “10 il sonra özümü hüquq-mühafizə orqanlarında çalışan hüquqşünas kimi görürəm, lakin vaxt keçdikcə hədəf və planlar dəyişdiyinə görə 10 il sonrakı mövqeyim fərqli ola bilər. Əminəm ki, hansı mövqedə olmağımdan asılı olmayaraq, ölkəm üçün faydalı olmağa çalışacağam”.

Gənclərə tövsiyəsi isə budur: “Hər kəs hədəfini düzgün müəyyənləşdirib üzərində möhkəm çalışmalıdır. Ən əsası isə harada olursunuzsa olun, Azərbaycanı layiqincə təmsil etməyin məsuliyyətini dərk edin və qazandığınız bilikləri ölkəmizin inkişafına yönəldin”.