Aprelin 8-də İstanbulda X Avrasiya Beynəlxalq Ali Təhsil Sammiti (EURIE) öz işinə başlayıb.

“Azərbaycan müəllimi” xəbər verir ki, sammitdə çıxış edən Türkiyənin Ali Təhsil Şurasının rəhbəri Erol Özvar Türkiyə–Azərbaycan Universitetinin fəaliyyətinə toxunub. Qeyd edib ki, "Türkiyə–Azərbaycan Universiteti təhsil tərəfdaşlığının mühüm nümunəsidir".

E.Özvarın sözlərinə görə, Azərbaycanın paytaxtı Bakıdakı Türkiyə–Azərbaycan Universiteti Türkiyənin Yaxın Şərq Texniki, İstanbul Texniki və Hacettepe kimi aparıcı universitetlərinin tanınmış proqramlarını həyata keçirən "çətir universitet" kimi fəaliyyət göstərir ki, bu da onların innovativ yanaşmaları və gələcək Beynəlxalq təhsil tərəfdaşlığı üçün mühüm presedent yaradır.

"Bu uğurlu modeli davam etdirən Türkiyə bu yaxınlarda Özbəkistanda türk dövlətləri Beynəlxalq Universitetinin yaradılması haqqında sazişləri rəsmiləşdirdi. Əvvəlcə mühəndislik, informasiya, tibb və kənd təsərrüfatı proqramları üzrə fəaliyyətə başlayacaq bu universitet Azərbaycanda uğurlu təcrübəmizi təkrarlamağa çalışır. Qlobal akademik əməkdaşlığı təşviq etmək üçün Türkiyənin geniş təcrübəsindən və güclü təhsil infrastrukturundan istifadə edərək bu təsirli modeli türk dünyasına, İslam dünyasına və Afrikaya yaymağa çalışırıq", – deyə E.Özvar bildirib.

Təhsilin müasir dünyada ölkələri birləşdirən güclü körpülər qurduğunu bildirən E.Özvar Avrasiya Universitetlər Birliyi tərəfindən keçirilən Sammitin qlobal dialoq və əməkdaşlıq üçün müstəsna platforma olduğunu, sammitdə ali təhsil sahəsində qurumların əlaqələrini necə daha güclü və davamlı edə biləcəyinin müzakirə ediləcəyini bildirib.

E.Özvar qlobal miqyasda ali təhsilin inkişaf edən texnologiyalar, dəyişən sosial gözləntilər və iqtisadi reallıqlar nəticəsində əhəmiyyətli transformasiyalar yaşadığını bildirib:

"Universitetlər artıq təkcə akademik biliklər verməkdən ibarət deyil, həm də rəqəmsal inkişaflar və beynəlxalq əməkdaşlıq kimi bir çox genişləndirilmiş rol və öhdəliklərlə qarşı-qarşıyadır. Qurumlar çevik, yenilikçi və müasir cəmiyyətin dəyişən tələblərinə cavab vermək üçün tez uyğunlaşmalıdırlar. 

Ali Təhsil Şurasının 2024-2028-ci illər Strateji Planında müəyyən edilmiş strateji hədəflərdən birinin beynəlmiləlləşmə olduğunu bildirən E.Özvar bu məqsədin mahiyyətinin Türkiyə ali təhsilini regional və qlobal akademik və təhsil mobilliyinin mərkəz nöqtələrindən biri kimi yerləşdirmək olduğunu vurğulayıb: "Türkiyə hazırda dünyanın ən yaxşı 10 ölkəsi arasında yer alan təxminən 360 min beynəlxalq tələbəyə ev sahibliyi edir və bu rəqəmi 2030-cu ilə qədər bir milyona çatdırmağı hədəfləyir. Beynəlmiləlləşmə vizyonumuzun digər bir komponenti olaraq Ali Təhsil Şurası davamlı olaraq universitetlərimizi beynəlxalq imicini artırmağa təşviq edir. Biz universitetlərimizin qlobal miqyasda artan yüksək səviyyəli rəqabətə effektiv şəkildə hazırlaşmasına dəstək oluruq".